اسلام آباد: حکومت نے ملک میں پٹرولیم مصنوعات کی موجودہ قیمتیں تاحکمِ ثانی برقرار رکھنے کا فیصلہ کیا ہے۔ اس سلسلے میں وزارتِ توانائی (پٹرولیم ڈویژن) کی جانب سے باقاعدہ نوٹیفکیشن بھی جاری کر دیا گیا ہے۔ پٹرولیم ڈویژن کے اعلامیے کے مطابق، گزشتہ ہفتے مقرر کی گئی قیمتوں کو ہی اگلے احکامات تک برقرار رکھا جائے گا۔
یاد رہے کہ حکومت نے گزشتہ ہفتے پٹرولیم مصنوعات کی قیمتوں میں نمایاں کمی کی تھی، جس کے تحت پٹرول کی قیمت میں 74 روپے کی بڑی کٹوتی کے بعد فی لیٹر قیمت 299 روپے 50 پیسے مقرر کی گئی تھی۔
اسی طرح تیز رفتار ڈیزل (ہائی اسپیڈ ڈیزل) کی قیمت میں بھی 67 روپے کی کمی کی گئی تھی، جس سے اس کی فی لیٹر قیمت کم ہو کر 311 روپے 47 پیسے پر آ گئی تھی۔ حکومت نے اب انہی قیمتوں کو برقرار رکھنے کا فیصلہ کیا ہے۔
ذرائع کا کہنا ہے کہ عالمی مارکیٹ میں خام تیل کی قیمتوں میں مسلسل کمی کا رجحان دیکھا جا رہا ہے اور اب بین الاقوامی سطح پر تیل کی قیمتیں ایران اور امریکہ کے درمیان حالیہ کشیدگی سے پہلے کی سطح سے بھی نیچے آ گئی ہیں۔
عالمی مارکیٹ کے اسی استحکام کے پیشِ نظر حکومتِ پاکستان نے فی الحال قیمتوں میں کوئی تبدیلی نہ کرنے کا فیصلہ کیا ہے۔
دیکھیے: بھارت: کاکروچ احتجاج میں پیلٹ گن استعمال کے شواہد سامنے آگئے، برطانوی میڈیا