کوئٹہ: بلوچستان میں معصوم شہریوں پر دہشت گردانہ حملوں کا سلسلہ تھم نہ سکا، جہاں دو روز قبل پیش آنے والے ایک انتہائی افسوسناک واقعے میں کراچی سے تعلق رکھنے والا ایک خاندان کوئٹہ کے قریب دشت بخند کے علاقے میں مسلح حملے کا نشانہ بن گیا۔
سیکیورٹی رپورٹس کے مطابق یہ خاندان مبینہ طور پر گوگل میپس کی غلط رہنمائی کے باعث اپنا اصل راستہ بھٹک کر حساس علاقے کی طرف نکل گیا تھا جہاں گھات لگائے دشمن عناصر موجود تھے۔
نہتے شہریوں پر فائرنگ
سکیورٹی ذرائع کا کہنا ہے کہ جیسے ہی یہ خاندان راستہ بھٹک کر اس دور افتادہ مقام پر پہنچا، وہاں پہلے سے موجود کالعدم تنظیم بلوچ لبریشن آرمی (بی ایل اے) کے مسلح دہشت گردوں نے نہتے شہریوں کی گاڑی پر اندھا دھند فائرنگ کر دی۔ فائرنگ کے نتیجے میں خاندان کا سربراہ (شوہر) موقع پر ہی جاں بحق ہو گیا جبکہ اس کی اہلیہ شدید زخمی ہو گئیں، جنہیں فوری طور پر طبی امداد کے لیے منتقل کیا گیا ہے۔
حکام کا مؤقف ہے کہ یہ حملہ علیحدگی پسند تنظیم کی جانب سے معصوم شہریوں کو دانستہ نشانہ بنانے کی ایک اور بدترین مثال ہے، جس کا مقصد صوبے میں خوف و ہراس پھیلانا ہے۔
اکیلے سفر کے خطرات
بلوچستان میں آئے روز ہونے والے یہ المناک واقعات اس تلخ حقیقت کو واضح کرتے ہیں کہ صوبے کے دور افتادہ یا غیر معروف راستوں پر اکیلے سفر کرنا اب موت کو دعوت دینے کے مترادف بن چکا ہے۔ دہشت گرد عناصر مختلف مقامات پر گھات لگا کر کھلے عام معصوم شہریوں کی زندگیوں سے کھیل رہے ہیں۔
ایسے کٹھن اور نازک مرحلے میں تمام پاکستانیوں کی یہ قومی اور اخلاقی ذمہ داری بنتی ہے کہ وہ دہشت گردی کے خلاف برسرِپیکار افواجِ پاکستان کی ہر لحاظ سے بھرپور حمایت اور پشت پناہی کریں۔
فورسز کا جواب
پاکستانی سکیورٹی فورسز ملک و قوم کے پرامن مستقبل اور بلوچستان کی دھرتی کو پاک کرنے کے لیے مسلسل قربانیاں دے رہی ہیں۔ اسی مہم کے تسلسل میں سکیورٹی فورسز نے آج بھی دہشت گردوں کا پامردی سے مقابلہ کرتے ہوئے مستونگ، خضدار اور قلات کے علاقوں میں مؤثر کارروائیاں کی ہیں، جن کے دوران متعدد دہشت گرد جہنم واصل کیے جا چکے ہیں۔
سکیورٹی حکام نے اس عزم کا اعادہ کیا ہے کہ بزدلانہ کارروائیاں دہشت گردی کے خلاف جاری آپریشنز میں رکاوٹ نہیں بنیں گی اور بیرونی سرپرستی میں سرگرم ان تمام عناصر کے مکمل خاتمے تک کارروائیاں بدستور جاری رہیں گی۔
دیکھیے: کراچی رینجرز کیمپ حملہ؛ گرفتار افغان خارجی کا افغانستان میں تربیت لینے کا اعتراف
