واشنگٹن: امریکی صدر ڈونلڈ ٹرمپ نے نائب صدر جے ڈی وینس اور وزیر خارجہ مارکو روبیو کو ہدایت کی ہے کہ ایران کے ساتھ سفارتی رابطے اور بات چیت کا سلسلہ جاری رکھا جائے۔ امریکی میڈیا رپورٹس کے مطابق اس اقدام کا مقصد تہران کے ساتھ جاری شدید کشیدگی کو قابو میں رکھنا ہے۔
صدر ٹرمپ کی جانب سے ان اعلیٰ حکام کو دی جانے والی ہدایات کے تحت واشنگٹن سفارتی چینلز کے ذریعے ایران کے جوہری پروگرام، علاقائی سلامتی اور دیگر متنازع امور پر مذاکرات کا عمل برقرار رکھنا چاہتا ہے۔
یہ اہم سفارتی پیش رفت ایسے وقت میں سامنے آئی ہے جب حالیہ دنوں میں امریکہ اور ایران کے درمیان سخت بیانات اور فوجی حملوں کا تبادلہ ہوا ہے۔ تاہم، ان جھڑپوں کے باوجود دونوں ممالک کے درمیان بالواسطہ سفارتی رابطوں کی اطلاعات مسلسل سامنے آتی رہی ہیں۔
سیاسی و دفاعی ماہرین کے مطابق ٹرمپ کی اس نئی ہدایت سے واضح ہوتا ہے کہ واشنگٹن ایک جانب ایران پر سخت سفارتی و فوجی دباؤ برقرار رکھنا چاہتا ہے، تو دوسری جانب مصالحت کے لیے سفارتی راستہ بھی کھلا رکھنے کی پالیسی پر گامزن ہے۔
دیکھیے: بھارت: کاکروچ احتجاج میں پیلٹ گن استعمال کے شواہد سامنے آگئے، برطانوی میڈیا
