خیبر پختونخوا کے ضلع کرم میں امن و امان کو سبوتاژ کرنے کی بزدلانہ کوشش سامنے آئی ہے، جہاں شلوزان تنگی کے علاقے میں واقع ایف سی کی ایک چوکی پر مسلح افراد نے اچانک حملہ کر دیا۔
پولیس کے مطابق مسلح حملہ آوروں کی جانب سے کی جانے والی اندھا دھند فائرنگ کے نتیجے میں فرنٹئیر کانسٹیبلری کے 7 اہلکار زخمی ہو گئے، جنہیں فوری طبی امداد کے لیے قریبی ہسپتال منتقل کر دیا گیا ہے۔
حملے کے فوری بعد چوکی پر تعینات ایف سی کے جوانوں نے انتہائی دلیری کے ساتھ جوابی کارروائی کی۔ سکیورٹی فورسز کی اس مؤثر اور دندان شکن جوابی فائرنگ کے نتیجے میں 1 حملہ آور موقع پر ہی ہلاک ہو گیا جبکہ اس کے دیگر ساتھی شدید زخمی ہوئے۔
پولیس حکام کا کہنا ہے کہ فورسز کے سخت جواب کے بعد دیگر مسلح حملہ آور پسپا ہونے پر مجبور ہو گئے اور بوکھلاہٹ میں اپنے ہلاک ہونے والے ساتھی کی لاش وہیں موقع پر چھوڑ کر فرار ہو گئے۔ سکیورٹی فورسز نے علاقے کو گھیرے میں لے کر سرچ آپریشن شروع کر دیا ہے۔
