امریکی اخبار وال اسٹریٹ جرنل نے دعویٰ کیا ہے کہ صدر ڈونلڈ ٹرمپ ایران کے خلاف فوجی کارروائی کے حوالے سے مزید آپشنز زیرِ غور لا رہے ہیں، جن میں آبنائے ہرمز کے قریب واقع ایرانی جزائر پر امریکی زمینی فوج اتارنے کا امکان بھی شامل ہے۔
رپورٹ کے مطابق گزشتہ کئی روز کے دوران اعلیٰ سطحی بریفنگز کا سلسلہ جاری رہا، جن میں صدر ٹرمپ کو سفارتی کوششوں کے ساتھ ساتھ ممکنہ زمینی فوجی کارروائی کے مختلف منصوبوں سے بھی آگاہ کیا گیا۔
ذرائع نے بتایا کہ صدر ٹرمپ کی زیرِ صدارت منعقدہ اجلاس میں ایران پر فوجی دباؤ بڑھانے سے متعلق متعدد تجاویز پر غور کیا گیا۔
رپورٹ میں انکشاف کیا گیا ہے کہ زیرِ غور آپشنز میں شدید فضائی حملے، جوہری سرگرمیوں سے منسلک قلعہ بند تنصیبات پر بمباری، جزیرہ خارگ سمیت دیگر اہم مقامات پر قبضے کی کارروائیاں، اور جوہری پروگرام سے جڑے ٹنل کمپلیکس کو نشانہ بنانے کی تجاویز شامل ہیں۔
دوسری جانب نائب صدر جے ڈی وینس نے جو روگن ایکسپیرینس پوڈکاسٹ میں گفتگو کرتے ہوئے کہا کہ اگر ایرانی عوام خود اٹھ کھڑے ہونا چاہتے ہیں اور اپنی حکومت تبدیل کرنا چاہتے ہیں تو یہ ان کا اپنا معاملہ ہے۔
انہوں نے واضح کیا کہ امریکہ حکومت کی تبدیلی کے لیے ڈیڑھ لاکھ زمینی فوجی اس وقت تک نہیں بھیجے گا جب تک ایرانی عوام خود اس مقصد کے حصول کے لیے تیار نہ ہوں، اور امریکہ کسی صورت فوج بھیجنے نہیں جا رہا۔
صدر ٹرمپ اور جے ڈی وینس کے ان بیانات کے بعد اب ابہام پیدا ہو رہا ہے۔ ایک جانب ٹرمپ کا بیان ہے جبکہ دوسری جانب جے ڈی وینس کا بیان ہے۔
اسی طرح جے ڈی وینس کا یہ مؤقف بھی سامنے آیا ہے کہ اسرائیل کسی صورت یہ نہیں چاہتا کہ امریکہ اور ایران کے درمیان کوئی بھی امن معاہدہ طے پائے، کیونکہ تل ابیب تہران کو اپنے لیے ایک مستقل سکیورٹی خطرہ تصور کرتا۔
دیکھیے: امریکہ کا ایران پر دوبارہ حملہ، متعدد فوجی تنصیبات نشانہ بنانے کا دعویٰ
