سابق افغان کمانڈر جنرل سمیع سادات نے دعویٰ کیا ہے کہ افغان طالبان پاکستان کے خلاف برسرِ پیکار کالعدم تنظیموں کی پشت پناہی کر رہے ہیں۔
ان کا کہنا ہے کہ کابل انتظامیہ پاکستان دشمن گروہوں کو ہر قسم کی عسکری اور مالی معاونت فراہم کر رہی ہے۔ ایک حالیہ انٹرویو میں گفتگو کرتے ہوئے جنرل سمیع سادات نے کہا کہ پاکستان کے خلاف حملے کرنے والے گروہوں کو افغان طالبان کی مکمل حمایت حاصل ہے۔
جنرل سمیع سادات نے الزام عائد کیا کہ افغان طالبان کے بھارت کے ساتھ انتہائی قریبی تعلقات ہیں۔ ان کے مطابق طالبان کو بھارت سے بھاری مالی امداد بھی موصول ہو رہی ہے۔ سابق افغان فوجی کمانڈر نے مزید دعویٰ کیا کہ بھارت سے ملنے والے مالی وسائل افغان طالبان بعد ازاں ٹی ٹی پی کو منتقل کرتے ہیں۔
ان کا کہنا تھا کہ یہی فنڈز بی ایل اے کو بھی فراہم کیے جاتے ہیں تاکہ وہ پاکستان کے اندر تخریبی کارروائیاں کر سکیں۔ واضح رہے کہ پاکستان اور افغانستان کے مابین سرحدی سلامتی اور ٹی ٹی پی کے محفوظ ٹھکانوں پر کشیدگی طویل عرصے سے برقرار ہے۔
دیکھیے: طالبان وزیر کا سراج الدین حقانی پر تنقیدی وار، سینئر رہنماؤں کی وفاداری پر سوال
