خیبر پختونخوا کے ضلع صوابی میں تیز موسلا دھار بارش کے بعد سڑکیں اور گلی کوچے ندی نالوں کا منظر پیش کرنے لگے ہیں، جس کے باعث شہریوں اور مسافروں کو آمدورفت میں شدید مشکلات کا سامنا ہے۔
مقامی ذرائع کے مطابق بارش کا پانی سڑکوں پر کھڑا ہونے سے نظامِ زندگی درہم برہم ہو گیا ہے۔ پانی کے نکاس کا مناسب نظام نہ ہونے کی وجہ سے اہم شاہراہیں اور تجارتی مراکز ندی نالوں کی شکل اختیار کر چکے ہیں۔
قابلِ ذکر بات یہ ہے کہ خیبر پختونخوا میں پی ٹی آئی مسلسل گزشتہ 12 سال سے اقتدار میں ہے اور صوابی میں بھی یہ ان کی مسلسل تیسری حکومت ہے۔ اس کے باوجود بنیادی انفراسٹرکچر اور سیوریج کے نظام کی یہ حالت انتظامی ناکامی کا منہ بولتا ثبوت ہے۔
سیاسی و عوامی حلقوں کا کہنا ہے کہ جب صوبائی حکومت کی تمام تر توجہ، وقت اور طاقت صرف سیاسی احتجاج، مظاہروں اور قیدی رہنماؤں سے ملاقاتوں کے گرد گھوم رہی ہو، تو عوام کو درپیش ایسے بنیادی مسائل کا پسِ پشت چلے جانا کوئی انوکھی بات نہیں ہے۔
صوابی کے شہریوں نے صوبائی حکومت اور مقامی انتظامیہ سے فوری طور پر سڑکوں سے پانی کی نکاسی اور نالوں کی صفائی کے لیے ہنگامی اقدامات اٹھانے کا مطالبہ کیا ہے تا کہ عوام کو درپیش اذیت سے نجات مل سکے۔
دیکھیے: لکی مروت: تختی خیل قوم کا دہشتگردوں کے خلاف ڈٹ جانے اور پاک فوج کی حمایت کا عزم