بعض اوقات تصاویر بولتی ہیں۔ دیر میں منعقدہ گرینڈ جرگے کے دوران آئی جی ایف سی خیبر پختونخوا (نارتھ) میجر جنرل راؤ عمران سرتاج نے مشران کے روبرو زمین پر بیٹھ کر خطاب کیا، جسے جرگے کی اصل روح کا عملی اظہار قرار دیا جا رہا ہے۔
میجر جنرل راؤ عمران سرتاج کا پروٹوکول کے بغیر مجمعے میں بیٹھنا سکیورٹی فورسز اور عوام کے درمیان باہمی قربت، اعتماد اور احترام کی ایک واضح مثال کے طور پر سراہا جا رہا ہے۔ یہ عمل اس بات کا عکاس ہے کہ عوام کا فوج پر اور فوج کا عوام پر بھروسا کس قدر مضبوط ہے۔
جرگے کی تفصیلات
انسپکٹر جنرل فرنٹیئر کور خیبر پختونخوا (نارتھ) کی زیرِ صدارت دیر اپر اور دیر لوئر کے مشران، عمائدین اور متعلقہ انتظامی و سکیورٹی حکام کے ساتھ یہ گرینڈ جرگہ منعقد ہوا، جس میں دونوں اضلاع کی موجودہ امن و امان کی صورتحال کا جامع جائزہ لیا گیا اور پائیدار امن کے قیام کے لیے مشترکہ اور مربوط لائحۂ عمل پر غور کیا گیا۔
جرگے میں کمشنر مالاکنڈ ڈویژن، ریجنل پولیس آفیسر مالاکنڈ، کمانڈنٹ دیر سکاؤٹس، ڈپٹی کمشنرز دیر اپر و لوئر، ڈسٹرکٹ پولیس آفیسرز دیر اپر و لوئر سمیت ملک و مشران اور عمائدین کی بڑی تعداد نے شرکت کی۔
اس موقع پر میجر جنرل راؤ عمران سرتاج نے خطاب کرتے ہوئے کہا کہ دیر اپر اور دیر لوئر میں پائیدار امن، استحکام اور عوام کے جان و مال کے تحفظ کو یقینی بنانا حکومت، سکیورٹی فورسز، پولیس اور عوام کی مشترکہ ذمہ داری ہے۔
دیکھیے: لکی مروت: تختی خیل قوم کا دہشتگردوں کے خلاف ڈٹ جانے اور پاک فوج کی حمایت کا عزم