خیبرپختونخوا کے ضلع خیبر میں مقامی باشندوں نے کارروائی کرتے ہوئے تحریک طالبان پاکستان سے وابستہ ایک افغان شہری کو موٹر سائیکل چوری کی کوشش کے دوران رنگے ہاتھوں پکڑ کر سکیورٹی حکام کے حوالے کر دیا ہے۔
ذرائع کے مطابق ملزم موٹر سائیکل چوری کرنے کی کوشش کر رہا تھا کہ مقامی افراد نے اسے موقع پر ہی قابو کر لیا۔ ابتدائی اطلاعات میں دعویٰ کیا گیا ہے کہ چوری کی جانے والی اس موٹر سائیکل کو بعد میں کسی ممکنہ خودکش حملے میں استعمال کرنے کی منصوبہ بندی کی جا رہی تھی۔
واقعے کے فوراً بعد سکیورٹی اداروں نے ملزم کو تحویل میں لے کر تفتیش کا آغاز کر دیا ہے، جبکہ اس کے دیگر سہولت کاروں اور نیٹ ورک کا سراغ لگانے کے لیے کارروائیاں جاری ہیں۔ تاہم، موٹر سائیکل کو خودکش حملے کے لیے استعمال کرنے کے دعوے کی آزاد ذرائع سے تاحال تصدیق نہیں ہو سکی۔
مقامی حلقوں کے مطابق ملک بھر بالخصوص سرحدی اضلاع میں چوری، ڈکیتی اور دیگر غیر قانونی و جرائم پیشہ سرگرمیوں میں افغان شہریوں کی ملوث ہونے کی اطلاعات سامنے آتی رہتی ہیں۔ سکیورٹی اداروں کی جانب سے افغان شہریوں کی غیر قانونی آمدورفت اور سرگرمیوں پر سخت نظر رکھی جا رہی ہے۔
خیبرپختونخوا میں دہشت گردی اور ناخوشگوار واقعات میں ٹی ٹی پی اور ان کے نیٹ ورک کے خلاف سکیورٹی اداروں کا آپریشن مسلسل جاری ہے، تاکہ علاقے میں امن و امان کی صورتحال کو یقینی بنایا جا سکے۔
دیکھیے: وزیرستان: سیکیورٹی فورسز کا انٹیلی جنس آپریشن، اہم خارجی دہشتگرد ہلاک
