سیکیورٹی فورسز نے وزیرستان میں دہشت گردوں کی موجودگی کی اطلاع پر انٹیلی جنس کی بنیاد پر کامیاب آپریشن کرتے ہوئے فتنۃ الخوارج کے اہم اور انتہائی مطلوب دہشت گرد خارجی عبداللہ کو ہلاک کر دیا ہے۔
سیکیورٹی ذرائع کے مطابق یہ کارروائی خفیہ اطلاعات کی بنیاد پر کی گئی، جہاں دہشت گرد چھپ کر سیکیورٹی فورسز اور معصوم شہریوں کے خلاف تخریبی کارروائیوں کی منصوبہ بندی کر رہے تھے۔ فورسز نے کارروائی کرتے ہوئے علاقے کو گھیرے میں لیا اور شدید فائرنگ کے تبادلے کے بعد اہم خارجی کو جہنم واصل کر دیا۔
ہلاک ہونے والا خارجی عبداللہ سیکیورٹی فورسز پر حملوں اور دیگر دہشت گردانہ سرگرمیوں میں ملوث اور فورسز کو شدید مطلوب تھا۔ علاقے میں مزید کسی بھی ممکنہ الخوارج دہشت گرد کے خاتمے کے لیے سرچ آپریشن اور کلیئرنس سویپ بدستور جاری ہے۔
سیکیورٹی فورسز کی جانب سے خیبر پختونخوا کے سرحدی اضلاع بالخصوص وزیرستان میں فتنۃ الخوارج اور ان کے سہولت کاروں کے خلاف کارروائیاں پوری قوت اور تسلسل کے ساتھ جاری ہیں۔ مسلسل انٹیلی جنس بیسڈ آپریشنز کے نتیجے میں خوارج کے نیٹ ورک کو شدید نقصان پہنچا ہے اور ان کے اہم کمانڈر یکے بعد دیگرے منطقی انجام کو پہنچ رہے ہیں۔
پاک فوج اور سیکیورٹی ادارے ملک سے دہشت گردی کے مکمل خاتمے کے لیے پرعزم ہیں اور عسکریت پسندوں کے خلاف مؤثر و ٹارگٹڈ آپریشنز کامیابی کے ساتھ جاری رہیں گے تاکہ خطے میں دائمی امن و استحکام کو یقینی بنایا جا سکے۔
