بلوچستان کے ضلع پنجگور میں سیکیورٹی فورسز نے دہشت گردوں کے ایک بڑے اور مربوط حملے کو ناکام بنا دیا۔
ذرائع کے مطابق 45 سے 50 دہشت گردوں نے سیکیورٹی فورسز کی ایک چوکی پر منظم انداز میں حملہ کرنے کی کوشش کی، تاہم سیکیورٹی فورسز نے بروقت اور موثر کارروائی کرتے ہوئے حملے کو پسپا کر دیا۔
فورسز کی جوابی کارروائی کے نتیجے میں 5 دہشت گرد ہلاک ہوگئے۔ علاقے میں کلیئرنس آپریشن کے دوران دستی بم، امپرووائزڈ ایکسپلوسیو ڈیوائسز (آئی ای ڈیز) اور کالعدم تحریک طالبان پاکستان (ٹی ٹی پی) سے منسلک مواد بھی برآمد کیا گیا۔
پنجگور میں ٹی ٹی پی سے وابستہ عناصر کی جانب سے کیے گئے اس حملے سے یہ بات سامنے آئی ہے کہ مختلف نظریات اور پس منظر رکھنے والے دہشت گرد گروہ اب باہمی تعاون کے ساتھ مشترکہ کارروائیاں کر رہے ہیں، جو سیکیورٹی حکام کے لیے ایک اہم اور تشویشناک پیش رفت ہے۔
سیکیورٹی ذرائع کا کہنا ہے کہ علاقے میں امن و امان کو یقینی بنانے کے لیے آپریشن جاری ہے اور دہشت گردوں کے خلاف کارروائیاں مزید تیز کردی گئی ہیں۔