خیبرپختونخوا کے ضلع جنوبی وزیرستان میں سکیورٹی فورسز نے خوارج کے خلاف انٹیلی جنس بیسڈ آپریشن 11 گرج کیا، جس کے دوران 6 خوارج ہلاک کر دیے گئے۔ سکیورٹی ذرائع کے مطابق یہ کارروائی خوارج کی موجودگی سے متعلق مصدقہ انٹیلی جنس اطلاعات کی بنیاد پر کی گئی۔
ذرائع کے مطابق سکیورٹی فورسز نے کارروائی سے قبل علاقے کی فضائی نگرانی کی اور مشتبہ افراد کی نقل و حرکت پر نظر رکھی۔ نگرانی کے دوران خوارج کو ایک مقام پر اکٹھا ہوتے دیکھا گیا، جس کے بعد سکیورٹی فورسز نے ان کے خلاف مؤثر فائرنگ کی۔
کارروائی کے آخری مرحلے میں کواڈ کاپٹر کے ذریعے فیصلہ کن کارروائی کی گئی، جس کے نتیجے میں 6 خوارج ہلاک ہوئے۔ سکیورٹی فورسز نے علاقے میں کارروائی مکمل کرنے کے بعد خوارج کے ٹھکانے کی تلاشی بھی لی۔
اسلحہ اور بارود برآمد
تلاشی کے دوران بڑی مقدار میں اسلحہ، گولہ بارود اور بارودی مواد برآمد کیا گیا، جبکہ خوارج کا قائم کردہ اسلحہ اور دھماکہ خیز مواد کا ذخیرہ بھی تباہ کر دیا گیا۔ سکیورٹی فورسز کے مطابق برآمد ہونے والا مواد دہشت گردی کی کارروائیوں میں استعمال کیا جا سکتا تھا۔
سکیورٹی فورسز نے اس کارروائی کو علاقے میں دہشت گرد عناصر کے خلاف جاری کارروائیوں کا حصہ قرار دیتے ہوئے کہا ہے کہ دہشت گردوں کے نیٹ ورکس اور ان کے ٹھکانوں کے خاتمے کے لیے انٹیلی جنس کی بنیاد پر آپریشنز جاری رہیں گے۔ سکیورٹی فورسز کا کہنا ہے کہ ملک کے امن و استحکام کو نقصان پہنچانے والے عناصر کے مکمل خاتمے تک کارروائیاں بلا تعطل جاری رکھی جائیں گی۔
دیکھیے: خیبر پختونخوا: 7 ماہ میں 156 پولیس اہلکار جاں بحق، رپورٹ جاری
