آج 12 ربیع الاول ہے اور ملک بھر میں سرورِ کونین، رحمت اللعالمین، خاتم النبیین حضرت محمد ﷺ کی ولادتِ باسعادت کی مبارک مناسبت مذہبی عقیدت و احترام کے ساتھ منائی جا رہی ہے۔ ملک کے طول و عرض میں محافلِ نعت کا انعقاد جاری ہے اور درود و سلام کی صداؤں سے فضائیں معطر ہیں۔
دن کا آغاز روایتی انداز میں توپوں کی سلامی سے ہوا۔ وفاقی دارالحکومت اسلام آباد میں 31 جبکہ تمام صوبائی دارالحکومتوں میں 21، 21 توپوں کی سلامی دی گئی، جس سے فضا نعرہ ہائے تکبیر سے گونج اٹھی۔
نمازِ فجر کے بعد مساجد اور گھروں میں ملکی سلامتی، ترقی، خوشحالی اور امتِ مسلمہ کے اتحاد کے لیے بالخصوص دعا کی گئی۔
مبارک دن کی مناسبت سے شہری عشقِ رسول ﷺ میں معطر ہو کر ملک بھر میں شاندار تقریبات کا اہتمام کر رہے ہیں۔ مساجد، عمارتوں، بازاروں اور چوراہوں کو برقی قمقموں اور سبز پرچموں سے خوبصورت انداز میں سجایا گیا ہے۔
کراچی سے لے کر آزاد کشمیر تک مختلف شہروں میں عاشقانِ رسول ﷺ کی جانب سے ریلیاں اور جلوس نکالے جا رہے ہیں۔
مختلف اضلاع میں جلوس
پنجاب کے شہروں ملتان، گوجرانوالہ، سیالکوٹ، سرگودھا، جھنگ، فیصل آباد اور رحیم یار خان میں مرکزی جلوس برآمد ہو رہے ہیں۔
اسی طرح سندھ کے مختلف اضلاع حیدرآباد، سکھر، لاڑکانہ، میرپورخاص، سجاول، خیرپور، ٹھٹہ اور گھوٹکی میں بھی لوگ بڑی تعداد میں جلوسوں میں شریک ہیں۔
خیبرپختونخوا کے شہروں مانسہرہ، بنوں، مردان، ڈیرہ اسماعیل خان اور نوشہرہ سمیت بلوچستان، آزاد کشمیر اور گلگت بلتستان میں بھی عقیدت مند محافلِ نعت اور درود و سلام کا انعقاد کر رہے ہیں۔
سکیورٹی اقدامات
وفاقی دارالحکومت میں 12 ربیع الاول کے جلوسوں اور مذہبی اجتماعات کے لیے سکیورٹی، ٹریفک اور صفائی کے خصوصی انتظامات کیے گئے ہیں۔ ضلعی انتظامیہ نے علما، پولیس اور جلوس منتظمین کے ساتھ اجلاس میں روٹس، سکیورٹی اور ٹریفک پلان کا جائزہ لیا تھا۔
انتظامیہ کے مطابق مذہبی اجتماعات کے دوران شہریوں کی سہولت اور سکیورٹی کو ترجیح دی جا رہی ہے، جبکہ مختلف مکاتبِ فکر کے علما نے امن، مذہبی ہم آہنگی اور نظم و ضبط برقرار رکھنے میں تعاون کی یقین دہانی کرائی ہے۔
سیرتِ نبوی ﷺ سے رہنمائی
12 ربیع الاول کی مناسبت سے منعقد ہونے والی تقریبات میں سیرتِ نبوی ﷺ کے مختلف پہلوؤں، بالخصوص عدل، رحم، مساوات، اخوت، برداشت اور انسانیت سے حسنِ سلوک کو اجاگر کیا جا رہا ہے۔
ملک بھر میں عقیدت مند اس مبارک موقع پر نبی کریم ﷺ کی تعلیمات پر عمل پیرا ہونے اور معاشرے میں امن، بھائی چارے اور باہمی احترام کو فروغ دینے کے عزم کا اظہار کر رہے ہیں۔