خیبرپختونخوا اور بلوچستان میں سکیورٹی فورسز نے فتنۃ الخوارج اور فتنۃ الہندوستان کے خلاف کارروائیوں کے دوران مجموعی طور پر 11 دہشت گردوں کو ہلاک کردیا۔
ذرائع کے مطابق خیبرپختونخوا کے مختلف علاقوں میں انٹیلی جنس معلومات کی بنیاد پر کارروائیاں کی گئیں، جن میں سکیورٹی فورسز نے فتنۃ الخوارج کے ٹھکانوں کو نشانہ بنایا۔ کارروائی کے دوران متعدد خوارج مارے گئے جبکہ ان کے قبضے سے اسلحہ اور دیگر سامان بھی برآمد کیا گیا۔
دوسری جانب بلوچستان میں بھی سکیورٹی فورسز نے فتنۃ الہندوستان کے عناصر کے خلاف مؤثر کارروائی کی۔ فائرنگ کے تبادلے میں متعدد دہشت گرد ہلاک ہوئے جبکہ ان کے ٹھکانوں اور نقل و حرکت کو نشانہ بنایا گیا۔
ذرائع کے مطابق جنوبی وزیرستان، بنوں اور خضدار میں منظم انٹیلی جنس بیسڈ آپریشنز کیے گئے، جن کے دوران مجموعی طور پر 11 دہشت گردوں کے مارے جانے کی اطلاع ہے۔
سکیورٹی فورسز نے واضح کیا ہے کہ ملک میں امن و استحکام کے قیام اور دہشت گرد عناصر کے مکمل خاتمے کے لیے کارروائیاں جاری رہیں گی۔ متعلقہ علاقوں میں کلیئرنس آپریشن بھی جاری رکھا گیا تاکہ باقی ماندہ عناصر اور ان کے سہولت کاروں کا سراغ لگایا جا سکے۔
