پنجاب میں سی ٹی ڈی کی کارروائی، پاکپتن سے را کا مبینہ دہشت گرد گرفتار

سی ٹی ڈی نے پنجاب کے مختلف شہروں میں کارروائیاں کرتے ہوئے 13 دہشت گردوں کو گرفتار کر لیا ہے۔

ترجمان سی ٹی ڈی کے مطابق صوبہ بھر میں 98 انٹیلی جنس بیسڈ آپریشنز کیے گئے۔ ان کارروائیوں کے دوران پاکپتن سے بھارتی خفیہ ایجنسی را کا اہم کارندہ واجد بھی پکڑا گیا۔

گرفتار ہونے والے دیگر ملزمان میں عثمان، نعیم، عبدالمنان، اسامہ، حسن اور بابر شامل ہیں۔

ترجمان نے بتایا کہ دہشت گردوں کے قبضے سے 3 آئی ای ڈی بم، ایک دستی بم اور دھماکہ خیز مواد برآمد ہوا ہے۔ اس کے علاوہ 12 ڈیٹونیٹرز اور 35 فٹ فیوز وائر بھی تحویل میں لے لی گئی۔

حکام کے مطابق ملزمان کے خلاف متعلقہ تھانوں میں 13 مقدمات درج کر کے تحقیقات شروع کر دی گئی ہیں۔

مزید برآں رواں ہفتے پنجاب میں 1595 کومبنگ آپریشنز بھی کیے گئے۔ ان آپریشنز میں 55 ہزار سے زائد افراد کی تصدیق کی گئی جبکہ 52 مشتبہ افراد کو حراست میں لیا گیا۔

ترجمان سی ٹی ڈی نے عزم ظاہر کیا کہ محفوظ پنجاب کے ہدف کے لیے انٹیلی جنس بیسڈ کارروائیاں بلا تعطل جاری رہیں گی۔