اقوام متحدہ میں پاکستان کے نائب مستقل مندوب عثمان جدون نے عالمی برادری پر زور دیا ہے کہ وہ غزہ میں شہریوں کا تحفظ یقینی بنائے۔
نیویارک میں خطاب کرتے ہوئے انہوں نے کہا کہ غزہ تک انسانی امداد کی بلارکاوٹ رسائی اور بین الاقوامی قوانین کی مکمل پاسداری لازمی ہے۔
عثمان جدون نے واضح کیا کہ انسانی حقوق کے نظام کی ساکھ قول و فعل کے تضاد کو ختم کرنے میں ہے۔ قوانین کا ایک جگہ نفاذ اور دوسری جگہ چشم پوشی ہرگز قابلِ قبول نہیں۔
انہوں نے غزہ کی بگڑتی ہوئی صورتحال کو عالمی برادری کے ضمیر کا امتحان قرار دیا۔ اس موقع پر انہوں نے فلسطینی عوام کے حقِ خودارادیت کی غیر متزلزل حمایت کا اعادہ کیا۔
پاکستانی مندوب کا کہنا تھا کہ حقِ خودارادیت کا عالمگیر اصول مقبوضہ جموں و کشمیر کے عوام پر بھی لاگو ہوتا ہے۔ کشمیری عوام تقریباً آٹھ دہائیوں سے سلامتی کونسل کی قراردادوں پر عمل کے منتظر ہیں۔
انہوں نے اسلامو فوبیا، نسل پرستی اور تعصب کے بڑھتے ہوئے رجحانات کے خلاف مشترکہ لائحہ عمل اپنانے پر زور دیا۔
عثمان جدون نے اختتام پر کہا کہ انسانی حقوق کے اصولوں کا اطلاق بلا امتیاز اور عالمگیر سطح پر ہونا چاہیے۔ انصاف کو سیاست کی نذر کرنے کا سلسلہ بند ہونا چاہیے۔