ضلع کیچ کی تحصیل بلیدہ میں فتنۃ الہندوستان کے دہشت گردوں نے ایک نجی پرائمری اسکول پر دھاوا بول دیا۔ حملہ آوروں نے کلاس رومز کی نگرانی پر مامور سی سی ٹی وی کیمروں کی توڑ پھوڑ کی اور اندھا دھند فائرنگ کی، جس سے معصوم بچوں میں شدید خوف و ہراس پھیل گیا۔
اس بزدلانہ واقعے کے بعد مقامی شہریوں نے سڑکوں پر نکل کر شدید احتجاج کیا۔ مظاہرین کا کہنا تھا کہ اسکولوں کو نشانہ بنانا اور بچوں کو خوفزدہ کرنا تعلیم اور امن کے خلاف کھلی جنگ ہے۔ مقامی آبادی نے دہشت گردوں کے اس طرزِ عمل کو یکسر مسترد کر دیا۔
سیکیورٹی فورسز کی پیش قدمی
اطلاع ملتے ہی سیکیورٹی فورسز فوری طور پر موقع پر پہنچ گئیں، تاہم اہلکاروں کی آمد سے قبل ہی دہشت گرد فرار ہو چکے تھے۔ سیکیورٹی ذرائع کا کہنا ہے کہ فورسز کا سامنا کرنے کی ہمت نہ پا کر یہ عناصر آسان اہداف کو نشانہ بنا رہے ہیں۔
تعلیم کا تحفظ
حکام کے مطابق تعلیمی نظام میں رکاوٹ ڈالنا اور بچوں کا مستقبل چھیننا کسی صورت قبول نہیں۔ سیکیورٹی فورسز نے علاقے میں امن و امان کی بحالی اور دہشت گردی کے مکمل خاتمے کے لیے اپنے عزم کا اعادہ کیا ہے۔
دیکھیے: باجوڑ میں سکیورٹی فورسز کا انٹیلی جنس آپریشن، 5 خوارج ہلاک