سابق وزیرِاعظم کے گھر چوری، اے سی سے کھڑکیوں تک کچھ نہ بچا

راولپنڈی میں سابق وزیرِ اعظم راجہ پرویز اشرف کی رہائش گاہ پر چوری کا واقعہ پیش آیا ہے۔ جاتلی کے علاقے ڈھوک امب میں واقع گھر سے ایئر کنڈیشنرز، دروازے، کھڑکیاں اور دیگر سامان غائب ہے۔

راجہ پرویز اشرف کے پرسنل سیکریٹری طیب فضل کی درخواست پر تھانہ جاتلی میں مقدمہ درج کر لیا گیا ہے۔ پولیس کے مطابق چوری شدہ سامان کی مالیت تقریباً 2 لاکھ 70 ہزار روپے بتائی گئی ہے۔

اے سی، کھڑکیاں چوری

ایف آئی آر کے مطابق ملزمان رہائش گاہ سے 3 ایئر کنڈیشنرز، 2 دروازے اور 2 کھڑکیاں لے گئے۔ چوروں نے قالین، کراکری، آرائشی اشیا اور گھاس کاٹنے والی مشین بھی چوری کرلی۔

مقدمے کے متن میں بتایا گیا ہے کہ رہائش گاہ کے مختلف مقامات پر تالے ٹوٹے ہوئے پائے گئے۔ پولیس واقعے کے مختلف پہلوؤں کا جائزہ لے رہی ہے۔

گھریلو ملازم غائب

ایف آئی آر کے مطابق سابق وزیرِ اعظم کی رہائش گاہ پر تعینات ایک گھریلو ملازم مبینہ طور پر غائب ہے۔ ڈیوٹی پر موجود پولیس اہلکاروں کے حوالے سے بتایا گیا ہے کہ ملازم گزشتہ رات سے وہاں موجود نہیں تھا اور اس کا موبائل فون بھی بند ہے۔

تاہم، ملازم کے چوری میں ملوث ہونے کی تصدیق نہیں ہوئی۔ پولیس نے مقدمہ درج کر لیا ہے اور واقعے کی مزید تحقیقات جاری ہیں۔