وزیر مملکت برائے داخلہ طلال چوہدری نے سوال اٹھایا ہے کہ کیا امان اللہ کے گھر موجود مہمان خود کو قانون سے بالاتر سمجھتے ہیں؟ ان کا یہ بیان اسلام آباد میں مدارس سمیت مختلف عمارتوں میں غیر قانونی تعمیرات کے خلاف سی ڈی اے کی کارروائیوں کے تناظر میں سامنے آیا ہے۔
کیپیٹل ڈیولپمنٹ اتھارٹی (سی ڈی اے) نے اسلام آباد میں منظور شدہ بلڈنگ پلان کے بغیر تعمیرات کرنے اور عمارتوں کے استعمال سے متعلق قواعد کی خلاف ورزی پر متعدد مدارس کو نوٹسز جاری کیے ہیں۔
سی ڈی اے نے مدرسہ اختر العلوم، بلال ٹاؤن، کورنگ نالہ، کھنہ ڈاک کو منظور شدہ بلڈنگ پلان کے بغیر تعمیرات کرنے پر نوٹس جاری کیا ہے۔ مدرسے کی انتظامیہ کو 15 روز کے اندر تعمیراتی نقشے جمع کرانے کی ہدایت کی گئی ہے۔ بصورت دیگر عمارت سیل کرنے کی کارروائی کا انتباہ دیا گیا ہے۔
اسی طرح ادارہ معارف اسلامیہ، شریعہ ربانیہ اور تفی القرآن، مکان نمبر 3، اسٹریٹ نمبر 6، سیکٹر ایف 8/3 میں بھی غیر قانونی تعمیرات کی نشاندہی کی گئی ہے۔ سی ڈی اے کے مطابق مذکورہ عمارت میں سیٹ بیکس اور چھت پر غیر مجاز تعمیرات کی گئی ہیں۔
سی ڈی اے نے اس بات پر بھی اعتراض اٹھایا ہے کہ عمارت کو رہائشی استعمال کے بجائے مدرسے کے طور پر استعمال کیا جا رہا ہے۔ انتظامیہ کو تمام خلاف ورزیاں 15 روز کے اندر ختم کرنے کی ہدایت کی گئی ہے۔
اتھارٹی نے خبردار کیا ہے کہ احکامات پر عمل نہ کرنے کی صورت میں عمارت سیل کرنے، جرمانے عائد کرنے اور الاٹمنٹ منسوخ کرنے کی کارروائی کی جا سکتی ہے۔
سی ڈی اے کے مطابق اسلام آباد میں بلڈنگ کنٹرول قوانین پر عمل درآمد کے لیے مدارس سمیت مختلف عمارتوں کے خلاف کارروائی شروع کر دی گئی ہے۔
