نجی ٹی وی کی اینکر پرسن ربیعہ احسن کے قتل کیس میں اہم پیش رفت سامنے آئی ہے، جہاں مقتولہ کے بھائی نے اپنے بہنوئی کے خلاف درج مقدمہ واپس لینے کا اعلان کرتے ہوئے واقعے کو ناگہانی حادثہ قرار دے دیا۔
مقتولہ کے بھائی نے گفتگو کرتے ہوئے کہا کہ ابتدائی طور پر مقدمہ انہوں نے خود درج کروایا تھا، تاہم اب وہ اپنا مقدمہ واپس لے رہے ہیں۔
ان کا کہنا تھا کہ ان کے بہنوئی احسن نے قتل کی نیت سے فائرنگ نہیں کی تھی۔ دونوں میاں بیوی کے درمیان کسی قسم کی ناچاقی، جھگڑا یا خلش بھی نہیں تھی۔
ربیعہ احسن کے بھائی کے مطابق واقعے کے وقت ان کی والدہ، بہنیں، بھانجیاں اور گھر کی ملازمہ بھی وہاں موجود تھیں۔ انہوں نے کہا کہ یہ قتل کا منصوبہ بند واقعہ نہیں بلکہ ایک ناگہانی حادثہ تھا۔
دوسری جانب مقتولہ کے بھائی کے نئے بیان کے بعد راولپنڈی پولیس نے واقعے کی مختلف پہلوؤں سے تحقیقات جاری رکھی ہوئی ہیں۔ پولیس اب حادثے کے امکان کو بھی مدنظر رکھتے ہوئے معاملے کی چھان بین کر رہی ہے۔
