خلیج تعاون کونسل (جی سی سی) کے رکن ممالک نے کویت میں مشترکہ عسکری کمانڈ کا جدید ہیڈکوارٹر قائم کرنے اور وہاں افواج تعینات کرنے کی منظوری دے دی ہے۔ اس اقدام کا مقصد خلیجی ممالک کی مشترکہ دفاعی صلاحیتوں کو مضبوط بنانا اور ممکنہ خطرات سے نمٹنے کے لیے فوجی تعاون بڑھانا ہے۔
جی سی سی کے سیکرٹری جنرل جاسم محمد البدیوی کے دفتر سے جاری بیان کے مطابق یہ فیصلہ منگل کو منامہ میں جوائنٹ ڈیفنس کونسل کے 23ویں اجلاس میں کیا گیا۔
بیان میں کہا گیا کہ مشترکہ عسکری ہیڈکوارٹر کا قیام خلیجی ممالک کی سلامتی اور خودمختاری کے تحفظ کے عزم کا اظہار ہے۔ اس سے مشترکہ خطرات کا مقابلہ کرنے کی صلاحیت بھی بہتر ہوگی۔
جاسم محمد البدیوی نے ایرانی حملوں کے بعد خلیجی ممالک کے درمیان فوجی تعاون اور ہم آہنگی کو سراہتے ہوئے اسے علاقائی یکجہتی کی عملی مثال قرار دیا۔
تاہم مشترکہ عسکری ہیڈکوارٹر کی ساخت، وہاں تعینات ہونے والی افواج کی تعداد اور عملی ذمہ داریوں کے حوالے سے مزید تفصیلات جاری نہیں کی گئیں۔
عسکری کمانڈ کا پس منظر
خلیج تعاون کونسل میں بحرین، کویت، عمان، قطر، سعودی عرب اور متحدہ عرب امارات شامل ہیں۔ ان ممالک نے دسمبر 2013 میں کویت میں ہونے والے سربراہی اجلاس کے دوران مشترکہ عسکری کمانڈ قائم کرنے کا فیصلہ کیا تھا۔
اس کمانڈ کا بنیادی مقصد مشترکہ فوجی کارروائیوں کی منصوبہ بندی اور رکن ممالک کی زمینی، فضائی اور بحری سرحدوں کے دفاع کو مضبوط بنانا ہے۔
