کابل میں طالبان حکومت کی جانب سے معروف ہزارہ رہنما محمد زمان المعروف رزمندہ کی گرفتاری نے ہزارہ برادری میں سخت تشویش اور بے چینی پیدا کر دی ہے۔
محمد زمان کو ہزارہ مزاحمتی تحریک کے اہم ترین رہنما کمانڈر عبد الغنی علی پور کے نائب کے طور پر جانا جاتا ہے۔
افغان اینالسٹس نیٹ ورک کی رپورٹ کے مطابق ہزارہ برادری سے تعلق رکھنے والی مزاحمتی شخصیات کی گرفتاری سے سیاسی اختلاف کو دبانے اور اقلیتوں کو خوف زدہ کرنے کا تاثر مضبوط ہو رہا ہے۔
طالبان کے اقتدار میں آنے کے بعد سے افغانستان میں ہزارہ برادری کو مسلسل عدم تحفظ، امتیازی سلوک اور سیاسی محرومی جیسے شدید مسائل کا سامنا ہے۔
حالیہ گرفتاری کے بعد انتظامیہ کی جانب سے قیدی کے مقام، عائد کردہ الزامات اور قانونی کارروائی سے متعلق شفاف معلومات فراہم نہیں کی گئی ہیں، جس پر انسانی حقوق کی تنظیموں نے تشویش کا اظہار کیا ہے۔
قانونی ماہرین کے مطابق کسی بھی فرد کو بغیر کسی شفاف کارروائی یا اطلاع کے حراست میں رکھنا من مانی گرفتاری اور بنیادی انسانی حقوق کی سنگین خلاف ورزی کے زمرے میں آتا ہے۔
افغان تجزیہ کاروں کا کہنا ہے کہ طالبان حکومت ایک طرف افغانستان کی تمام برادریوں کی نمائندگی کا دعویٰ کرتی ہے، مگر دوسری جانب اقلیتوں اور مخالفین کو جبر کا نشانہ بنایا جا رہا ہے۔
رپورٹ کے مطابق نسلی بنیادوں پر امتیازی سلوک اور سیاسی دباؤ کو قومی سلامتی یا امن و امان کا نام دے کر کسی صورت درست قرار نہیں دیا جا سکتا۔
