تخار صوبے کے نائب گورنر ڈمولہ محمد نادر حقجو کے بیٹے محمد فتح سمیت دو بچوں کو اتوار کی دوپہر سَرِ پُل کے مرکزی علاقے سے اغوا کیا گیا۔ افغان میڈیا نے ابتدائی طور پر واقعے کی تصدیق کرتے ہوئے عوام سے معلومات فراہم کرنے کی اپیل کی تھی۔
ذرائع کے مطابق شام تک دونوں بچوں کو رہا کر دیا گیا۔ بعض اطلاعات میں بتایا گیا کہ ریسکیو آپریشن کے دوران دو مشتبہ افراد کو گرفتار بھی کیا گیا۔ خیال رہے کہ طالبان حکام نے اب تک اس واقعے پر سرکاری طور پر کوئی بیان جاری نہیں کیا ہے۔
یہ واقعہ اس پسِ منظر میں سامنے آیا ہے جب افغانستان میں اغواء، قتل اور دیگر جرائم میں نمایاں اضافہ دیکھنے میں آیا ہے۔ حالیہ مہینوں میں طالبان کے دعوؤں کے باوجود ملک میں قانون و انتظام کی صورت حال پر سوالات اٹھائے جا رہے ہیں۔ حفاظتی چیلنجوں کا یہ سلسلہ اب طالبان کے اپنے عہدیداروں اور ان کے خاندانوں کو بھی متاثر کرنے لگا ہے، جس سے حکام کی جانب سے امن و امان کے دعووں کی مشکلات واضح ہوتی ہیں۔
سیکورٹی ماہرین کے مطابق ایسے واقعات نہ صرف عام شہریوں بلکہ حکومتی اہلکاروں کے تحفظ کے نظام پر بھی سوالیہ نشان ہیں۔ عوامی حلقوں میں مطالبہ کیا جا رہا ہے کہ حکومت ملک بھر میں قانون نافذ کرنے والے اداروں کی کارکردگی بہتر بنائے اور شہریوں کی جان و مال کے تحفظ کے لیے ٹھوس اقدامات کرے۔
دیکھیں: گزشتہ سال دہشت گردی کے خلاف جنگ میں سیکیورٹی اداروں کی مثالی کارکردگی