افغانستان کے سفیر سہیل شاہین نے دوحہ میں اقوام متحدہ کے سیکریٹری جنرل کے خصوصی نمائندے داؤد المصری سے اہم ملاقات کی۔ تفصیلات کے مطابق فغانستان کے قطر میں سفارت خانے کے مطابق ملاقات کا مرکزی محور بچوں کے تحفظ سے متعلق امور، امارت ِ اسلامیہ کی جانب سے اس سلسلے میں کیے گئے اقدامات اور بارودی سرنگوں کے خاتمے کے لیے کی جانے والی صفائی کی کوششیں تھے۔
ملاقات کے دوران سفیر شاہین نے افغان حکومت کی جانب سے بارودی سرنگوں کی صفائی اور بچوں کے تحفظ کے میدان میں کی گئی عملی کوششوں کی تفصیلات سے آگاہ کیا۔ انہوں نے اس بات پر روشنی ڈالی کہ ملک میں امن و استحکام کے قیام کے بعد ان انسانی امور پر خصوصی توجہ دی جا رہی ہے۔
دوسری جانب اقوام متحدہ کے نمائندے داؤد المصری نے خطے میں پرامن ماحول کے قیام اور شہری آبادی بالخصوص ننھے بچوں کی جان و مال کے تحفظ کے لیے باہمی تعاون کی ضرورت اور اہمیت پر زور دیا۔
سفارت خانے کے مطابق اس نشست میں تعلیم اور صحت کی بنیادی سہولیات تک عام شہریوں کی رسائی بڑھانے، نیز تنازعات کے دوران بچوں کے حقوق کے تحفظ کے لیے بین الاقوامی تعاون کے نئے راستوں پر بھی بات چیت ہوئی۔