کابل میں افغان وزیر خارجہ مولوی امیر خان متقی نے پاکستان کے ساتھ جاری مذاکرات پر اطمینان کا اظہار کرتے ہوئے کہا ہے کہ بات چیت مثبت سمت میں آگے بڑھ رہی ہے اور امید ہے کہ تکنیکی مسائل اس عمل میں رکاوٹ نہیں بنیں گے۔
ترکی کے ناظم الامور سے ملاقات کے دوران انہوں نے خطے کی مجموعی صورتحال اور چین کے شہر ارومچی میں ہونے والے مذاکرات پر بھی تبادلہ خیال کیا۔ ان کے مطابق علاقائی تعاون اور مکالمہ استحکام کیلئے ناگزیر ہے۔
مولوی امیر خان متقی نے افغانستان اور ترکی کے تعلقات کو مضبوط قرار دیتے ہوئے ترکی کی ثالثی کی کوششوں کو اہم اور قابل قدر قرار دیا، جبکہ باہمی روابط کو مزید فروغ دینے پر زور دیا گیا۔
اس موقع پر ترک نمائندے نے پاکستان اور افغانستان کے درمیان تعلقات میں بہتری کو خوش آئند قرار دیتے ہوئے یقین دہانی کرائی کہ ترکی دونوں ممالک کے درمیان مثبت پیش رفت کیلئے اپنی سفارتی کوششیں جاری رکھے گا۔
تجزیہ کاروں کے مطابق پاکستان اور افغانستان کے درمیان مذاکرات کا مثبت تسلسل خطے میں امن و استحکام کیلئے اہم پیش رفت ہے، جہاں اسلام آباد کا سفارتی کردار مسلسل نمایاں ہو رہا ہے۔
دیکھئیے:کابل ملاقات: ترکیہ اور افغان حکام کے درمیان علاقائی صورتحال اور سفارتی امور پر تبادلہ خیال