امریکی صدر ڈونلڈ ٹرمپ نے دعویٰ کیا ہے کہ امریکہ نے وینزویلا کے ساتھ ایک معاہدے کے تحت 65 ارب بیرل سے زائد ثابت شدہ تیل کے ذخائر پر اکثریتی کنٹرول حاصل کر لیا ہے۔
ٹرمپ نے اپنے جاری بیان میں وینزویلا کے ساتھ دنیا کی تاریخ کا سب سے بڑا تیل کا معاہدہ طے پانے کا اعلان کیا۔
امریکی صدر کے مطابق ان کی ہدایت پر وزیر خارجہ مارکو روبیو اور وزیر جنگ پیٹ ہیگسیتھ نے وینزویلا کی عبوری صدر ڈیلسی روڈریگیز کے ساتھ مل کر نجی شعبے کی شراکت سے یہ معاہدہ طے کیا۔
ٹرمپ کا کہنا تھا کہ معاہدے کے نتیجے میں امریکہ کے تیل کے ذخائر دوگنا سے بھی زیادہ ہوجائیں گے جبکہ تیل کی رسد میں بھی نمایاں اضافہ ہوگا۔
انہوں نے دعویٰ کیا کہ اضافی تیل کی رسد مستقبل میں امریکی شہریوں کے لیے پیٹرول کی قیمتوں میں نمایاں کمی کا باعث بنے گی۔
ٹرمپ نے مزید کہا کہ معاہدے سے وینزویلا کو بڑی کامیابی حاصل ہوگی اور ملک کو خوشحالی کی جانب لے جانے میں مدد ملے گی۔
امریکی صدر کے مطابق امریکہ اور وینزویلا کے درمیان تعلقات پہلے ہی بہتر ہو رہے ہیں اور یہ معاہدہ دونوں ممالک کے تعلقات کو مزید مضبوط کرے گا۔
