وفاقی وزیر برائے امور کشمیر و گلگت بلتستان انجینئر امیر مقام نے کہا ہے کہ کشمیر کے عوام اس حقیقت سے بخوبی واقف ہیں کہ پاکستان اور کشمیر کا رشتہ لازوال ہے اور یہ ہمیشہ قائم رہے گا۔ انہوں نے اس عزم کا اظہار کیا کہ مسلم لیگ (ن) نے ملک کی تعمیر و ترقی کے ہر میدان میں عملی اور تاریخی کردار ادا کیا ہے، جس کی بدولت عوام کا اعتماد اس قیادت پر مزید پختہ ہوا ہے۔
اسلام آباد میں مسلم لیگ (ن) آزاد کشمیر کے زیرِ اہتمام منعقدہ شمولیتی جلسے سے خطاب کرتے ہوئے وفاقی وزیر امیر مقام نے کہا کہ مسلم لیگ (ن) آزاد کشمیر کے آئندہ عام انتخابات میں واضح اکثریت حاصل کر کے حکومت بنائے گی۔ اس موقع پر وفاقی وزیر مذہبی امور سردار یوسف نے بھی شرکاء سے خطاب کیا اور کہا کہ پاکستان کو ناقابلِ تسخیر ایٹمی طاقت بنانے کا سہرا مسلم لیگ کے قائد میاں نواز شریف کے سر ہے۔
جلسے کے دوران مظفر آباد حلقہ نمبر ایک سے سابق صدارتی مشیر سردار تبارک علی نے اپنے سینکڑوں ساتھیوں، تین ڈسٹرکٹ کونسلز کے نمائندوں اور 20 وارڈ اراکین سمیت باقاعدہ طور پر مسلم لیگ (ن) میں شمولیت کا اعلان کیا۔ انہوں نے قائد نواز شریف اور وزیراعظم شہباز شریف کی قیادت پر مکمل اعتماد کا اظہار کرتے ہوئے کہا کہ وہ خطے کی ترقی کے لیے مسلم لیگ کا پیغام گھر گھر پہنچائیں گے۔
مسلم لیگ آزاد کشمیر کے صدر شاہ غلام قادر اور دیگر مقررین نے سردار تبارک علی کی شمولیت کا خیر مقدم کرتے ہوئے کہا کہ اس اقدام سے آزاد کشمیر میں پارٹی کی تنظیمی جڑیں مزید مضبوط ہوں گی اور آنے والے انتخابات میں پارٹی کی کامیابی کی راہ ہموار ہوگی۔
