فیلڈ مارشل سید عاصم منیر اور وفاقی وزیر داخلہ محسن نقوی اہم سرکاری دورے پر ایران پہنچ چکے ہیں۔ آئی ایس پی آر کے مطابق یہ دورہ خطے میں امن، سلامتی اور استحکام کے فروغ کے لیے پاکستان کی سفارتی کوششوں کا حصہ ہے۔
دورے کے دوران فیلڈ مارشل سید عاصم منیر اور محسن نقوی کی ایرانی وزیر داخلہ اسکندر مومنی سے ملاقات ہو چکی ہے، جبکہ ایرانی اعلیٰ حکام سے دیگر اہم ملاقاتیں بھی جاری ہیں۔
آئی ایس پی آر کے مطابق فیلڈ مارشل سید عاصم منیر دورے کے دوران مشرقِ وسطیٰ میں جاری تنازع کے پرامن، پائیدار اور جامع حل کے لیے کوششوں کو آگے بڑھانے پر توجہ دیں گے۔
سفارتی ماہرین کے مطابق تہران کا یہ دورہ امریکہ کی جانب سے ملنے والی حالیہ اقتصادی دھمکی اور علاقائی کشیدگی کے پس منظر میں غیر معمولی اور انتہائی تزویراتی اہمیت اختیار کر چکا ہے۔
سفارتی ذرائع کے مطابق دونوں رہنما تہران میں ایرانی اعلیٰ قیادت اور فوجی حکام سے ملاقاتیں کریں گے، جن میں علاقائی سکیورٹی کی صورتحال پر تفصیلی تبادلہ خیال کیا جائے گا۔
ایران کا بیان
ایرانی وزارتِ خارجہ کے ترجمان اسماعیل بقائی نے پریس بریفنگ میں پاکستان کے ساتھ تعلقات کو بہترین قرار دیتے ہوئے کہا ہے کہ پاکستانی آرمی چیف کا دورۂ تہران دوطرفہ روابط اور مشترکہ امور کو مزید فروغ دے گا۔ انہوں نے واضح کیا کہ ایران جنگ کا خاتمہ کسی جارح فریق کی شرائط پر قبول نہیں کرے گا اور اپنی خودمختاری کے تحفظ کے لیے پرعزم ہے۔
مکہ معاہدہ
گزشتہ روز سے یہ اطلاعات بھی سامنے آ رہی تھیں کہ پاکستان نے ایران کو مکہ معاہدے کے تحت مذاکرات اور علاقائی کشیدگی کے خاتمے کی کوششوں میں شمولیت کی دعوت دی ہے۔
تاہم ایرانی وزارت خارجہ اسکی تردید کرتے ہوئے کہا کہ ایران کو مکہ معاہدے میں شمولیت کی دعوت موصول نہیں ہوئی۔
