فیلڈ مارشل سید عاصم منیر سے امریکی افغان جنگ کمیشن کے وفد نے جنرل ہیڈکوارٹرز (جی ایچ کیو) راولپنڈی میں ملاقات کی ہے۔ اس وفد کی قیادت شمائلا این چوہدری اور ڈاکٹر کولن ایف جیکسن نے کی۔
آئی ایس پی آر کے مطابق یہ وفد افغانستان میں امریکا کی 20 سالہ شمولیت کا جائزہ لے رہا ہے۔
ملاقات کے دوران باہمی دلچسپی کے امور، علاقائی سیکیورٹی کی صورتحال اور افغانستان میں ہونے والی تازہ پیشرفت پر تبادلہ خیال کیا گیا۔ اس موقع پر کمیشن کے دائرہ کار اور اہداف سے متعلق امور بھی زیر بحث آئے۔
پاکستان کا اصولی مؤقف
فیلڈ مارشل سید عاصم منیر نے افغان تنازع کی سیکیورٹی صورتحال سے متعلق پاکستان کا مؤقف واضح کیا۔ انہوں نے افغانستان میں طویل جنگ کے دوران پاکستان کو درپیش سنگین چیلنجز پر روشنی ڈالی۔
انہوں نے کہا کہ تنازع کے تزویراتی، سفارتی اور عملی پہلوؤں کے جائزے میں علاقائی نقطۂ نظر اور پاکستان کے عملی تجربات کو شامل کرنا ناگزیر ہے۔
امریکی وفد کا اعتراف
امریکی وفد نے افغان تنازع کے دوران پاکستان کے کلیدی کردار اور بے مثال قربانیوں کا اعتراف کیا۔ وفد کے ارکان نے خطے میں پائیدار امن اور استحکام کے لیے پاکستان کی مسلسل کاوشوں کو سراہا۔