فیلڈ مارشل سید عاصم منیر نے پاکستان آرڈیننس فیکٹری (پی او ایف) واہ کا دورہ کیا، جہاں انہوں نے مقامی طور پر تیار کیے گئے جدید اسلحے اور گولہ بارود کے ٹیسٹ و ٹرائلز کا مشاہدہ کیا۔
پاک فوج کے شعبہ تعلقات عامہ (آئی ایس پی آر) کے مطابق فیلڈ مارشل عاصم منیر کو پی او ایف کے مختلف شعبوں، آپریشنز اور جدید عسکری سازوسامان کی مقامی سطح پر تیاری کے حوالے سے بریفنگ دی گئی۔
دورے کے دوران پی او ایف کی پیداواری صلاحیت، برآمدات کے امکانات اور ملکی دفاعی صنعت میں ادارے کے کردار کا بھی جائزہ لیا گیا۔
آئی ایس پی آر کے مطابق آرمی چیف نے مقامی طور پر ڈیزائن اور تیار کیے گئے اسلحے اور گولہ بارود کے ٹیسٹ و ٹرائلز کا مشاہدہ کیا۔ انہیں ادارے میں جاری جدت، خود انحصاری اور دفاعی پیداواری صلاحیت بڑھانے کے اقدامات سے بھی آگاہ کیا گیا۔
پیداواری صلاحیت میں اضافہ
فیلڈ مارشل عاصم منیر کو ڈی آئی پی آر اے آرڈیننس کے نفاذ کے بعد پی او ایف کی کارپوریٹائزیشن کے عمل میں ہونے والی پیش رفت پر بھی بریفنگ دی گئی۔
آئی ایس پی آر کے مطابق مقامی پیداوار اور صنعتی صلاحیت بڑھانے کیلئے جاری اقدامات کے تحت 2 نئے صنعتی پلانٹس کی تنصیب بھی جاری ہے، جن سے رواں سال کے اختتام تک پیداوار شروع ہونے کا امکان ہے۔
دورے کے اختتام پر دفاعی شعبے میں خود انحصاری، مقامی پیداوار اور تکنیکی جدت کے فروغ کے عزم کا اعادہ کیا گیا۔