ایرانی وزارت خارجہ کے ترجمان اسماعیل بقائی نے کہا ہے کہ پاکستان کے فیلڈ مارشل عاصم منیر کل تہران کا دورہ کریں گے۔
ایرانی وزارت خارجہ کی جانب سے جاری بیان کے مطابق اسماعیل بقائی نے واضح کیا کہ فیلڈ مارشل کا یہ دورہ خطے میں امن و سلامتی کے فروغ کے لیے پاکستان کی جاری کوششوں کا تسلسل ہے۔ ان کا کہنا تھا کہ دورے کا بنیادی مقصد ایران اور پاکستان کے دوطرفہ تعلقات کو مزید مستحکم بنانا ہے۔ اس دوران فیلڈ مارشل عاصم منیر ایران کے اعلیٰ حکام سے اہم ملاقاتیں بھی کریں گے۔
ایرانی وزارتِ خارجہ کے ترجمان کے مطابق پاکستان ایران اور امریکا کے درمیان جاری کشیدگی کے خاتمے کے لیے ہونے والے مذاکرات میں ثالث کا کردار ادا کر رہا ہے۔ انہوں نے کہا کہ پاکستان کی جانب سے خطے میں امن و استحکام کے قیام کے لیے سفارتی کوششیں مسلسل جاری ہیں۔
ایرانی خبر ایجنسی کے مطابق دورے سے قبل پاکستان کے چیف آف ڈیفنس فورسز اور ایران کے وزیر خارجہ عباس عراقچی کے درمیان ٹیلی فونک رابطہ بھی ہوا تھا، جس میں دونوں رہنماؤں نے خطے کی مجموعی صورتحال پر تفصیلی تبادلہ خیال کیا۔
مبصرین کے مطابق فیلڈ مارشل عاصم منیر کا یہ دورہ ایسے وقت میں ہو رہا ہے جب خطے میں کشیدگی کم کرنے کے لیے سفارتی کوششیں تیز کر دی گئی ہیں، اور پاکستان کا کردار اس حوالے سے اہمیت اختیار کر گیا ہے۔
