خیبر پختونخوا کی باچا خان یونیورسٹی میں بھارتی ترانہ گانے اور نعرہ بازی کرنے کے الزام میں فارمیسی ڈیپارٹمنٹ کے چار طلبہ کو فوری طور پر جامعہ سے نکال دیا گیا ہے۔ یہ فیصلہ یونیورسٹی کی ڈسپلنری کمیٹی کے 73 ویں اجلاس میں کیا گیا، جس میں واقعے کی سنگینی کو مدنظر رکھتے ہوئے سخت تادیبی کارروائی کی سفارش کی گئی۔
تفصیلات کے مطابق،گزشتہ روز یونیورسٹی کے احاطے میں چند طلبہ کی جانب سے بھارتی ترانہ پیش کیا گیا اور نعرے لگائے گئے، جس کی ویڈیو بعد ازاں سوشل میڈیا پر وائرل ہوگئی۔ اس واقعے پر عوامی اور تعلیمی حلقوں میں شدید ردعمل سامنے آیا، جس کے بعد یونیورسٹی انتظامیہ نے فوری طور پر ڈسپلنری کمیٹی کا ہنگامی اجلاس طلب کیا۔
کمیٹی نے ویڈیو شواہد اور ابتدائی تحقیقات کی روشنی میں فارمیسی ڈیپارٹمنٹ کے چار طلبہ کو قصوروار قرار دیتے ہوئے ان کے اخراج کا حکم جاری کر دیا۔ انتظامیہ کی جانب سے جاری کردہ باضابطہ نوٹیفکیشن کے مطابق مذکورہ طلبہ کی ہاسٹل الاٹمنٹ بھی فوری طور پر منسوخ کر دی گئی ہے اور انہیں یونیورسٹی کی حدود چھوڑنے کی ہدایت کی گئی ہے۔ یونیورسٹی حکام کا موقف ہے کہ تعلیمی ادارے کے نظم و ضبط اور قومی وقار پر کوئی سمجھوتہ نہیں کیا جائے گا۔
