ترجمان ایرانی وزارتِ خارجہ اسماعیل بقائی نے ایران اور خطے سے متعلق امریکی پالیسی پر تنقید کرتے ہوئے کہا ہے کہ امریکی خارجہ پالیسی جھوٹ پر حد سے زیادہ انحصار کا شکار ہے۔
اسماعیل بقائی نے اپنے سماجی رابطوں کے پیغام میں روسی مصنف فیودور دوستوئیفسکی کے ناول دی برادرز کرامازوف کا حوالہ دیتے ہوئے کہا کہ ناول کا ایک اقتباس ایران اور خطے کے حوالے سے امریکی نظامِ حکمرانی اور خارجہ پالیسی کی موجودہ صورتحال کی درست عکاسی کرتا ہے۔
ان کے مطابق ناول میں بزرگ زوسیما کے حوالے سے بیان کیا گیا ہے کہ جو شخص خود سے جھوٹ بولتا اور اپنے ہی جھوٹ پر یقین کرتا ہے، وہ بالآخر اس مقام پر پہنچ جاتا ہے جہاں وہ اپنے اندر یا اپنے اردگرد سچ اور جھوٹ میں فرق نہیں کر پاتا، اور پھر اپنے اور دوسروں کے لیے تمام احترام کھو دیتا ہے۔
یہ بیان ایسے وقت میں سامنے آیا جب واشنگٹن اور تہران کے درمیان مہینوں سے جاری تنازع ختم کرنے کی کوششیں تاحال تعطل کا شکار ہیں، اور دونوں ممالک ایک دوسرے پر الزامات عائد کرتے رہے ہیں۔
نائب وزیرِ خارجہ
علاوہ ازیں ایران کے نائب وزیرِ خارجہ برائے قانونی و بین الاقوامی امور کاظم غریب آبادی نے کہا ہے کہ ایران امریکی صدر کی دھمکیوں سے خوفزدہ نہیں ہوگا اور آبنائے ہرمز صرف ایران کی کمان میں بند اور کھولا جائے گا۔ ایرانی میڈیا رپورٹس کے مطابق ان کا یہ ردعمل صدر ٹرمپ کی جانب سے آبنائے ہرمز کو امریکی علاقہ قرار دینے کی حالیہ دھمکی پر سامنے آیا۔