بلوچستان کے مختلف اضلاع میں سکیورٹی فورسز نے انٹیلی جنس معلومات پر مبنی موثر کارروائیاں کرتے ہوئے 9 دہشت گردوں کو ہلاک کر دیا ہے۔ یہ پیش رفت صوبے میں جاری آپریشن رد الفتنہ 3 کے تحت انجام دی گئی، جس کا مقصد دہشت گرد نیٹ ورکس کا مکمل خاتمہ اور امن و امان کی بحالی ہے۔
سکیورٹی ذرائع کے مطابق دہشت گردوں کی موجودگی اور مشکوک نقل و حرکت کی اطلاع پر فورسز نے مخصوص علاقوں کا محاصرہ کیا۔ ضلع سوراب کے علاقے حاجیکہ میں کی گئی ایک اہم کارروائی کے دوران سیکیورٹی فورسز اور دہشت گردوں کے درمیان شدید فائرنگ کا تبادلہ ہوا، جس میں متعدد شرپسند مارے گئے۔
کارروائیوں کے فوراً بعد فورسز نے متعلقہ علاقوں کو تحویل میں لے کر سرچ آپریشن شروع کر دیا تاکہ کسی بھی باقی ماندہ عنصر کا سراغ لگایا جا سکے۔ ہلاک ہونے والے دہشت گردوں کے ٹھکانوں سے بھاری مقدار میں اسلحہ، گولہ بارود، میگزین، دستی بم، واکی ٹاکی سیٹس اور موٹر سائیکلیں برآمد کی گئی ہیں۔
سکیورٹی حکام کا کہنا ہے کہ بلوچستان میں انٹیلی جنس بیسڈ آپریشنز کا سلسلہ اس وقت تک بلا تعطل جاری رہے گا جب تک صوبے سے دہشت گردی کا مکمل خاتمہ نہیں ہو جاتا۔ رد الفتنہ 3 کے تحت فورسز ہدف پر مبنی کارروائیوں کو مزید تیز کر رہی ہیں۔