سکیورٹی حکام کے مطابق شہر میں امن و امان کی صورتحال مکمل طور پر قابو میں لے لی گئی ہے، تاہم دہشت گردی اور بدامنی میں ملوث عناصر کے خلاف کاروائیاں مسلسل جاری رہیں گی۔ حکام نے واضح کیا کہ ریاست کسی بھی صورت میں عوام کو مسلح گروہوں یا قانون شکن عناصر کے رحم و کرم پر نہیں چھوڑے گی۔
رپورٹ کے مطابق جنرل آفیسر کمانڈنگ (جی او سی) اور انسپکٹر جنرل فرنٹیئر کور (آئی جی ایف سی) نے کوئٹہ شہر کا دورہ کیا، جہاں انہیں سکیورٹی صورتحال، جاری آپریشنز اور شہری تحفظ کے اقدامات سے آگاہ کیا گیا۔ اس موقع پر سکیورٹی حکام کا کہنا تھا کہ دہشت گردوں اور ان کے سہولت کاروں کے خلاف کاروائیاں بلا امتیاز جاری رہیں گی اور قانون کے مطابق ذمہ دار عناصر کو کیفرِ کردار تک پہنچایا جائے گا۔
حکام کے مطابق حالیہ واقعات کے بعد حساس تنصیبات، مالیاتی اداروں اور عوامی مقامات کی سکیورٹی مزید سخت کر دی گئی ہے تاکہ کسی بھی ناخوشگوار واقعے سے بچا جا سکے۔ سکیورٹی ذرائع کے مطابق ملک دشمن عناصر اور بیرونی حمایت یافتہ گروہوں کی سرگرمیوں پر کڑی نظر رکھی جا رہی ہے اور صورتحال کو مکمل طور پر معمول پر لانے کے لیے جامع اقدامات جاری ہیں۔
سکیورٹی حکام نے شہریوں کو یقین دہانی کرائی کہ ریاستی ادارے عوام کے تحفظ کے لیے مکمل طور پر متحرک ہیں اور ہر صورت میں امن و استحکام کو برقرار رکھا جائے گا۔
دیکھیے: افغانستان میں امن، خطے میں خوشحالی: پاکستان ۔ قازقستان کا تاریخی اعلامیہ
