ایران کے اہم خلیجی بندرگاہی شہر بندر عباس میں آٹھ منزلہ رہائشی عمارت میں زوردار دھماکہ ہوا، جس کے نتیجے میں عمارت کی دو منزلیں مکمل طور پر تباہ ہو گئیں۔ دھماکے کی شدت سے قریبی گاڑیاں اور دکانیں بھی متاثر ہوئی ہیں۔
ایرانی سرکاری میڈیا کے مطابق یہ واقعہ شہر کے معلم بلیوارڈ علاقے میں پیش آیا۔ دھماکے کے فوری بعد ریسکیو اور فائر فائٹنگ ٹیمیں موقع پر پہنچ گئیں اور ملبے تلاش اور امدادی کارروائیاں شروع کر دی گئی ہیں۔
افواہوں کی تردید
ایرانی میڈیا اور بعض سوشل میڈیا پلیٹ فارمز پر افواہیں گردش کر رہی تھیں کہ اس دھماکے میں اسلامی انقلابی گارڈ کور (آئی آر جی سی) نیوی کے کمانڈر بریگیڈیئر جنرل علی رضا تنگیرسی کو ہلاک کر دیا گیا، تاہم تسنیم نیوز اور آئی آر جی سی نیوز نے اس کی سختی سے تردید کی ہے۔ ایرانی کمانڈر ان چیف میجر جنرل عامر حاتمی نے دشمن کی کوششوں کو ناکام قرار دیتے ہوئے کہا کہ ملک کی فوجی اور جوہری صلاحیتوں پر کوئی اثر نہیں ہوا اور دشمن کے تخمینے غلط ثابت ہوئے ہیں۔
تاحال نوعیت نامعلوم
دھماکے کی اصل نوعیت اور اس کے محرکات تاحال واضح نہیں ہو سکے ہیں۔ ایرانی حکام نے واقعے کی تفتیش شروع کر دی ہے اور ممکنہ جانی نقصان کے حوالے سے کوئی حتمی معلومات جاری نہیں کی گئی ہیں۔ شہر کے اس حصے میں معمول کے مطابق کاروباری اور رہائشی سرگرمیاں جاری ہیں۔
دیکھیے: سی ایس ٹی او کی تاجکستان کو افغان سرحد سے دراندازی روکنے کے لیے فوجی معاونت