بنوں: خیبر پختونخوا کے ضلع بنوں میں سکیورٹی فورسز نے انٹیلی جنس معلومات پر مبنی ایک کامیاب اور بڑی کاروائی کرتے ہوئے فتنہ الخوارج کا نیٹ ورک تباہ کر دیا ہے۔ بکاخیل کے علاقے میں کی جانے والی اس کارروائی کے دوران سکیورٹی فورسز نے درست سمت میں ڈرون حملہ کر کے تین مسلح خوارج کو ہلاک کر دیا۔
سکیورٹی ذرائع کے مطابق قانون نافذ کرنے والے اداروں کو خفیہ اور مصدقہ اطلاعات موصول ہوئی تھیں کہ بکاخیل میں فتنہ الخوارج سے وابستہ دہشت گرد ایک گاڑی میں گولہ بارود لوڈ کر رہے ہیں۔
انٹیلی جنس معلومات پر فوری ردِعمل دیتے ہوئے سکیورٹی فورسز نے گاڑی کو ڈرون کے ذریعے نشانہ بنایا۔ شدید دھماکے کے نتیجے میں بارود سے بھری گاڑی مکمل طور پر تباہ ہو گئی اور اس میں سوار تینوں دہشتگرد موقع پر ہی مارے گئے۔
سکیورٹی حکام کا کہنا ہے کہ یہ کاروائی قانون نافذ کرنے والے اداروں کی اعلیٰ پیشہ ورانہ مہارت اور مربوط حکمتِ عملی کا ثبوت ہے، جس کے باعث دہشتگردوں کی ایک بڑی تخریبی کاروائی کو بروقت ناکام بنا دیا گیا۔
ریاستِ پاکستان کی جانب سے دہشتگردی کے خلاف اپنائی گئی زیرو ٹالرنس پالیسی کے تحت فتنہ الخوارج جیسے گروہوں کے نیٹ ورکس کو جڑ سے اکھاڑ پھینکنے کے لیے منظم اقدامات کا سلسلہ جاری ہے تاکہ ملک میں دیرپا امن اور شہریوں کے تحفظ کو یقینی بنایا جا سکے۔