بنوں: آپریشن عزمِ استحکام اور نیشنل ایکشن پلان کے تحت دہشت گردوں کے خلاف مؤثر کارروائیاں جاری ہیں۔ سیکیورٹی ذرائع کے مطابق، بنوں کے علاقے جانی خیل کے نواحی گاؤں شاد خان کلہ میں پولیس اور سیکیورٹی فورسز نے ایک مشترکہ انٹیلی جنس بیسڈ آپریشن کیا ہے۔ اس کامیاب کارروائی کے دوران 9 خوارج ہلاک جبکہ ایک شدید زخمی ہو گیا۔
تفصیلات کے مطابق، فورسز کو علاقے میں خوارج کی موجودگی کی خفیہ اور معتبر اطلاع موصول ہوئی تھی، جس پر کارروائی کرتے ہوئے مشترکہ ٹیموں نے دہشت گردوں کے ٹھکانے کو گھیرے میں لے کر مؤثر طریقے سے نشانہ بنایا۔ شدید فائرنگ کے تبادلے میں 9 شرپسند مارے گئے۔ ذرائع نے تصدیق کی ہے کہ ہلاک ہونے والے خوارج چند روز قبل فتح خیل پولیس اسٹیشن پر ہونے والے بزدلانہ دہشت گرد حملے میں بھی براہِ راست ملوث تھے اور سیکیورٹی اداروں کو مطلوب تھے۔
ٹھکانے کی تباہی کے بعد فورسز کی جانب سے علاقے میں وسیع پیمانے پر کلیئرنس آپریشن شروع کر دیا گیا ہے تاکہ فرار ہونے والے دیگر ممکنہ دہشت گردوں اور ان کے مقامی سہولت کاروں کا سراغ لگا کر انہیں قانون کے کٹہرے میں لایا جا سکے۔ سیکیورٹی حکام کا کہنا ہے کہ ملک سے فتنۃ الخوارج کے مکمل خاتمے تک یہ ٹارگٹڈ آپریشنز پوری قوت کے ساتھ جاری رہیں گے۔
دیکھئیے:نوجوان منفی پراپیگنڈے اور انفارمیشن وارفیئر سے باخبر رہیں، ڈی جی آئی ایس پی آر
