بنوں کینٹ پر راکٹ حملہ، شہر بھر میں خوف و ہراس

بنوں کینٹ میں واقع ڈیفنس کالونی پر نامعلوم سمت سے راکٹ داغا گیا، جس کے نتیجے میں زوردار دھماکہ ہوا اور شہر بھر میں خوف و ہراس پھیل گیا۔ پولیس کے مطابق راکٹ ایک زیرِ تعمیر عمارت سے ٹکرایا، تاہم کسی جانی نقصان کی اطلاعات نہیں ہیں۔

عینی شاہدین کے مطابق دھماکے کی آواز انتہائی شدید تھی، جس سے پورا شہر گونج اٹھا اور شہریوں میں خوف و ہراس پھیل گیا۔ واقعے کے فوراً بعد پولیس اور سکیورٹی اہلکار موقع پر پہنچے اور علاقے میں سرچ آپریشن شروع کر دیا۔

پولیس حکام کے مطابق واقعے کی نوعیت اور حملے کے محرکات کی تحقیقات جاری ہیں اور جائے وقوعہ سے ثبوت بھی اکٹھے کیے جا رہے ہیں۔ سکیورٹی اداروں نے بنوں کینٹ اور قرب و جوار کے علاقوں میں حفاظتی انتظامات مزید سخت کر دیے ہیں۔پولیس کا یہ بھی کہنا ہے کہ اس سے قبل بنوں کینٹ میں متعدد بار راکٹ حملے ہو چکے ہیں، جس کے پیشِ نظر سکیورٹی انتظامات کا ازسرِنو جائزہ لیا جا رہا ہے۔