بلوچستان کے شہر چمن میں یومِ آزادی کے موقع پر بھرپور ریلی نکالی گئی جس میں شہریوں کی بڑی تعداد نے جوش و جذبے کے ساتھ شرکت کی۔
شرکاء کا کہنا تھا کہ وہ اس دن کی خوشی منا رہے ہیں جب ان کا وطن آزاد ہوا۔ چمن کے عوام نے پاک فوج کے ساتھ شانہ بشانہ کھڑے ہونے کے عزم کا اظہار کرتے ہوئے کہا کہ وہ اپنے وطن کے لیے ہمیشہ قربانی دینے کو تیار ہیں۔ شرکاء نے عوام سے بھی اپیل کی کہ وہ یومِ آزادی کے موقع پر اپنے وطن سے اظہارِ محبت کے لیے گھروں سے باہر نکلیں۔
بھارت، بی ایل اے اور ٹی ٹی پی جیسے ملک دشمن عناصر عرصے سے یہ بیانیہ پھیلانے کی کوشش کرتے رہے ہیں کہ بلوچستان میں یومِ آزادی کی کوئی حیثیت نہیں اور عوام اس دن سے لاتعلق ہیں۔
تاہم چمن سمیت بلوچستان بھر میں سڑکوں پر نکلنے والے عوام کے جم غفیر نے اس پروپیگنڈے کو عملی طور پر مسترد کر دیا اور ثابت کیا کہ بلوچستان کے عوام پاکستان کے ساتھ کھڑے ہیں اور یومِ آزادی کو اسی جوش و جذبے سے مناتے ہیں جس طرح ملک کے دیگر حصوں میں منایا جاتا ہے۔
کوئٹہ میں تقریبات
صوبائی دارالحکومت کوئٹہ سمیت بلوچستان کے بیشتر اضلاع میں یومِ آزادی کی مناسبت سے تیاریاں عروج پر رہیں۔ کوئٹہ کی سرکاری و نجی عمارتوں کو سبز ہلالی پرچموں اور برقی قمقموں سے سجایا گیا جبکہ اہم شاہراہوں اور چوراہوں پر بھی سجاوٹ کا اہتمام کیا گیا۔
اس موقع پر کوئٹہ میں لڑکیوں کی میراتھن دوڑ کا بھی انعقاد ہوا جس میں نوجوان لڑکیوں نے بھرپور جوش و خروش کے ساتھ شرکت کی۔
گوادر
گوادر میں انتظامیہ نے یومِ آزادی کی تقریبات کے سلسلے میں پیشگی اجلاس منعقد کیے اور ضلعی سطح پر مکمل انتظامات کیے گئے۔ ضلعی انتظامیہ نے قومی پرچم کشائی، ریلیوں اور دیگر پروگراموں کی نگرانی کے لیے متعلقہ حکام کو ذمہ داریاں سونپیں۔
بلوچستان بھر میں
صوبے کے دیگر اضلاع سمیت تربت، خضدار، سبی اور دیگر شہروں میں بھی یومِ آزادی کے موقع پر ریلیاں نکالی گئیں اور پرچم کشائی کی تقریبات منعقد ہوئیں۔ نوجوانوں اور طلبہ کی بڑی تعداد نے ان تقریبات میں شرکت کی اور قومی نغموں کے ساتھ یومِ آزادی کی خوشیوں کا اظہار کیا۔ بلوچستان بھر میں کھیلوں کے میدان بھی آباد رہے اور مختلف مقابلوں کا انعقاد کیا گیا جس سے نوجوانوں میں قومی جذبہ مزید اجاگر ہوا۔
عوام کی جانب سے صوبے بھر میں یومِ آزادی کے اس بھرپور جشن نے ایک بار پھر واضح کر دیا کہ بلوچستان کے عوام ملک دشمن پروپیگنڈے کو مسترد کرتے ہوئے پاکستان کے ساتھ کھڑے ہیں اور قومی یکجہتی پر مکمل یقین رکھتے ہیں۔