چین نے جموں و کشمیر کے شاکسگام وادی علاقے پر بھارت کے دعوے کو سختی مسترد کرتے ہوئے کہا ہے کہ یہ علاقہ تاریخی اور قانونی طور پر چین کے تحت آتا ہے۔ تفصیلات کے مطابق چینی وزارتِ خارجہ کے ترجمان نے واضح کیا کہ شاکسگام وادی چین کا اہم حصہ ہے اور اس پر بیجنگ کا مکمل اختیار ہے۔
چینی ترجمان کا کہنا ہے کہ چین کو اپنے علاقے میں انفراسٹرکچر کی ترقی اور تعمیر کا مکمل حق حاصل ہے اور اس ضمن میں کسی بھی بیرونی مداخلت یا اعتراض کو مسترد کرتا ہے۔ انہوں نے مزید کہا کہ چین اپنے علاقائی سالمیت کے تحفظ کے لیے تمام تر ضروری اقدامات کرے گا اور کسی بھی قسم کی علاقائی دعوے دارانہ سرگرمیوں کو روکنے کا حق رکھتا ہے۔
شاکسگام وادی تاریخی طور پر ایک متنازعہ خطہ ہے جو چین کے سنکیانگ صوبے اور پاکستان کے زیر انتظام گلگت بلتستان کے درمیان واقع ہے۔ بھارت نے اس علاقے پر دعویٰ کیا ہوا ہے، جسے چین نے ہمیشہ مسترد کیا ہے۔
یہ بیان اس وقت سامنے آیا ہے جب بھارت نے حال ہی میں اس علاقے میں چینی انفراسٹرکچر منصوبوں پر تحفظات کا اظہار کیا تھا۔ چینی ترجمان نے کہا کہ بیجنگ خطے میں امن و استحکام برقرار رکھنے کے لیے پرعزم ہے، لیکن اپنے علاقائی حقوق کے تحفظ میں کسی بھی قسم کا سمجھوتہ نہیں کرے گا۔
دیکھیں: فیلڈ مارشل عاصم منیر نے بنگلہ دیش کے ایئر چیف کو مینار پاکستان کا علامتی تحفہ پیش کر دیا