وزیر اعلیٰ بلوچستان میر سرفراز بگٹی نے کہا ہے کہ خطے کی موجودہ صورتحال کے پیش نظر ایران میں مقیم پاکستانی شہریوں کی محفوظ وطن واپسی کے عمل کا باقاعدہ آغاز کر دیا گیا ہے۔ وزیر اعلیٰ سیکرٹریٹ سے جاری کردہ بیان کے مطابق اب تک 70 سے زائد پاکستانی شہری بحفاظت وطن پہنچ چکے ہیں، جنہیں سرحدی حکام کی جانب سے ضروری معاونت فراہم کی جا رہی ہے۔
وزیر اعلیٰ سرفراز بگٹی نے ہدایت کی ہے کہ امیگریشن حکام سرحدی مقامات پر چوبیس گھنٹے ڈیوٹی سرانجام دیں تاکہ مسافروں کی آمد و رفت کا عمل کسی تعطل کے بغیر منظم انداز میں مکمل ہو سکے۔ انہوں نے واضح کیا کہ حکومت اپنے شہریوں کی حفاظت کو اولیت دے رہی ہے اور سرحد پر تمام انتظامات کو حتمی شکل دی جا چکی ہے۔
اس سلسلے میں سرحد سے متصل اضلاع کی انتظامیہ کو بھی خصوصی احکامات جاری کیے گئے ہیں کہ وطن واپس لوٹنے والے مسافروں کو رہائش، خوراک اور طبی امداد سمیت تمام ممکنہ سہولیات فراہم کی جائیں۔ وزیر اعلیٰ نے متعلقہ حکام کو ہدایت کی ہے کہ وہ اس پورے عمل کی خود نگرانی کریں تاکہ شہریوں کو کسی بھی قسم کی دشواری کا سامنا نہ کرنا پڑے۔