کمانڈر نیشنل اسٹریٹجک کمانڈ جنرل سید عامر رضا نے کہا ہے کہ پاکستان کا ہر انچ محفوظ ہے اور سرحد پار سے دراندازی کسی صورت برداشت نہیں کی جائے گی۔ انہوں نے واضح کیا کہ ملکی سرحدوں کی خلاف ورزی کا فیصلہ کن جواب دیا جائے گا۔
پاکستان ملٹری اکیڈمی کاکول میں پاسنگ آؤٹ پریڈ سے خطاب کرتے ہوئے جنرل سید عامر رضا نے کہا کہ پاک فوج ملک کے چپے چپے کے دفاع کے لیے ہمہ وقت تیار ہے۔ انہوں نے نئے پاس آؤٹ ہونے والے کیڈٹس کو مبارک باد دیتے ہوئے کہا کہ ملکی سلامتی، وقار اور تحفظ کی بھاری ذمہ داری اب ان کے کندھوں پر ہے۔
کیڈٹس سے خطاب
جنرل سید عامر رضا نے کیڈٹس پر زور دیا کہ وہ دیانت داری، بہادری اور جرات کے ساتھ پیشہ ورانہ چیلنجز کا سامنا کریں۔ ان کے مطابق یہ اوصاف ایک کامیاب قیادت کے لیے بنیادی اہمیت رکھتے ہیں۔
انہوں نے خواتین کیڈٹس کی شرکت کو باعثِ فخر قرار دیتے ہوئے کہا کہ افواج پاکستان نے مختلف شعبوں میں اپنی صلاحیتوں کا لوہا منوایا ہے۔ انہوں نے مسلح افواج کے جوانوں کی قربانیوں کو بھی سراہا۔
کمانڈر نیشنل اسٹریٹجک کمانڈ نے کہا کہ پاکستان خطے میں کشیدگی کم کرنے کے لیے ثالثی کا کردار ادا کر رہا ہے۔ ان کے مطابق پاکستان کی ان کوششوں کو عالمی سطح پر سراہا گیا ہے۔
جنرل سید عامر رضا نے فلسطین میں انسانی حقوق کی خلاف ورزیوں کے خاتمے پر بھی زور دیا۔ انہوں نے کہا کہ مسئلہ کشمیر اقوام متحدہ کی قراردادوں کے مطابق حل طلب ہے۔
