پاکستانی سکیورٹی فورسز نے بروقت کارروائی کرتے ہوئے دالبندین سیکٹر میں پاک افغان بین الاقوامی سرحد عبور کرنے کی کوشش کرنے والے 3 افغان شہریوں کو گرفتار کرلیا۔
ذرائع کے مطابق گرفتار کیے گئے افراد وہی ہیں جنہیں گزشتہ روز رہا کیا گیا تھا اور اب دوبارہ سرحد عبور کرنے کی کوشش کرتے ہوئے سکیورٹی فورسز کے ہاتھوں پکڑے گئے۔
یہ پیش رفت ایسے وقت میں سامنے آئی ہے جب سرحد پار سے پاکستان میں دہشت گردی اور دراندازی کے خدشات برقرار ہیں۔ کابل پوائنٹ نے بھی گزشتہ روز خبردار کیا تھا کہ ان افراد کو پاکستان مخالف سرگرمیوں، بالخصوص کالعدم تحریک طالبان پاکستان (ٹی ٹی پی) کی دہشت گرد کارروائیوں کے لیے استعمال کیے جانے کا خدشہ ہے۔
سکیورٹی فورسز کی بروقت کارروائی نے مشتبہ افراد کو پاکستان میں داخل ہونے سے پہلے ہی روک دیا۔ واقعے نے پاک افغان سرحد پر مزید مؤثر نگرانی اور سخت سکیورٹی انتظامات کی اہمیت کو مزید اجاگر کردیا ہے۔
پاکستانی سکیورٹی ادارے مسلسل اس مؤقف کا اظہار کرتے رہے ہیں کہ افغانستان سے پاکستان میں غیر قانونی آمدورفت اور دہشت گرد عناصر کی نقل و حرکت کو روکنا ملکی سلامتی کے لیے ضروری ہے۔
دیکھیے: افغانستان: طالبان مخالف مسلح مزاحمت میں شدت، فیض آباد حملے میں 3 اہلکار ہلاک
