پاکستان کے ٹیسٹ کرکٹر فواد عالم نے ورلڈ کپ کے اہم میچوں میں اسپنر ابرار احمد کو پلیئنگ الیون کا حصہ نہ بنانے پر ٹیم مینجمنٹ، کوچ اور کپتان کو کڑی تنقید کا نشانہ بنایا ہے۔ ایک نجی ٹی وی شو میں گفتگو کرتے ہوئے فواد عالم نے ٹیم کے انتخاب پر حیرت کا اظہار کرتے ہوئے کہا کہ جب ٹورنامنٹ میں ابرار احمد جیسے ماہر اسپنر کی ضرورت تھی تو انہیں بینچ پر بٹھا دیا گیا، جبکہ ناکام بیٹرز اور آل راؤنڈرز کو مسلسل مواقع دیے گئے۔
فواد عالم نے ابرار احمد کی حالیہ کارکردگی کا حوالہ دیتے ہوئے کہا کہ سری لنکا کے خلاف محض 23 رنز دے کر 3 وکٹیں حاصل کرنا اس بات کا ثبوت تھا کہ وہ بہترین فارم میں ہیں، لیکن اس کے باوجود انہیں اہم میچوں سے باہر رکھا گیا۔ انہوں نے انتظامیہ سے سوال کیا کہ کیا یہ فیصلہ کسی منطق پر مبنی تھا یا محض پسند ناپسند کی بنیاد پر؟ فواد عالم کا کہنا تھا کہ عثمان طارق اور ابرار احمد کا ایک ساتھ کھیلنا ٹیم کے لیے سود مند ثابت ہو سکتا تھا لیکن مینجمنٹ نے اس آپشن کو نظر انداز کیا۔
سابق کرکٹر نے مزید کہا کہ “یہ ٹیم کسی کپتان، کوچ یا مینجمنٹ کی ذاتی ملکیت نہیں بلکہ پورے پاکستان کی ٹیم ہے، لہٰذا اسپن اسپیشلسٹ کو باہر بٹھانے کے فیصلے پر متعلقہ افراد کو جوابدہ ہونا پڑے گا۔” انہوں نے مطالبہ کیا کہ قومی ٹیم کے انتخاب میں ذاتی ترجیحات کے بجائے میرٹ اور ضرورت کو اولیت دی جانی چاہیے۔
دیکھیے: لائبہ خان نے شوہر جواد سے پہلی ملاقات اور محبت کی کہانی سے پردہ اٹھا دیا
