دریائے چناب، ستلج اور راوی بدستور سیلاب کی لپیٹ میں ، حفاظتی بند ٹوٹنے سے پنجاب میں سیکڑوں بستیاں زیر آب آنے سے ہزاروں افراد بے گھر ہو گئے ہیں ، سیلاب سے 17 افراد کے جاں بحق ہونے کی بھی اطلاعات ہیں۔
لاہورکے متعدد علاقوں میں سیلابی پانی داخل ہو گیا ہے ، دریائے راوی میں شاہدرہ کے مقام پر انتہائی اونچے درجے کا سیلاب ہے جس کی وجہ سے فرخ آباد، عزیز کالونی،امین پارک، افغان کالونی،شفیق آباد، مریدوالا کے علاقے متاثر ہوئے ہیں۔
لاہور میں رنگ روڈ سے ملحقہ بادامی باغ کے علاقے میں بھی دریائے راوی کا سیلابی پانی داخل ہوا ہے ۔ چوہنگ کے مختلف علاقے بھی زیر آب آ گئے ہیں۔ چوہنگ میں نجی ہاؤسنگ سوسائٹی پانی داخل ہونے کے بعد مکینوں نے نقل مکانی کر لی۔
دریائے راوی نے نارنگ منڈی میں بھی تباہی مچا دی، ہزاروں ایکڑ زرعی اراضی تباہ ہو گئی، مواصلات کا نظام درہم برہم ہونے کے باعث کئی دیہات اور ڈیرہ جات کا زمینی راستہ منقطع ہو گیا۔
اس کے علاوہ نارووال کے کئی دیہات زیر آب آ گئے، ہزاروں ایکڑپر کھڑی فصلیں تباہ ہو گئیں، شکر گڑھ نارووال روڈ بھی ڈوب گیا جبکہ قلعہ احمد آباد میں ریلوے ٹریک سیلاب کی زد میں آگیا جس کی وجہ سے ٹرینوں کی آمد و رفت معطل ہوگئی۔
چنیوٹ کی تحصیل لالیاں میں موضع کلری کا حفاظتی بند ٹوٹنے سے سو سے زائد دیہات پانی کی لپیٹ میں آنے کے بعد ہزاروں لوگوں نے نقل مکانی شروع کر دی ، چنیوٹ میں 8 لاکھ 5300 کیوسک سے زائد پانی کا سیلابی ریلا گزر رہا ہے۔
ساہیوال میں اورنگ آباد کے بند میں شگاف پڑنا شروع ہو گیا ہے ، بند سے ملحقہ آبادیاں پانی کی لپیٹ میں آ گئی ہیں ،انتظامیہ نے مکینوں کو محفوظ مقام پر منتقل ہونے کی ہدایت کر دی ہے۔
دوسری جانب محکمہ موسمیات نے ملک کے مختلف حصوں میں آج سے 2 ستمبر تک شدید بارشوں کی پیشگوئی کی ہے۔
محکمہ موسمیات کے مطابق راولپنڈی، اٹک ، جہلم، چکوال، لاہور، گوجرانوالہ، سیالکوٹ، گجرات اور نارووال میں 30 اور 31 اگست کے دوران شدید بارشوں کا امکان ہے جس سے سیلابی صورتحال متوقع ہے۔
ملتان، ڈی جی خان، راجن پور، لیہ، بھکر، ساہیوال ، بہاولپور، بہاولنگر اور رحیم یار خان میں 29 تا 31 اگست کے دوران بارشوں سے نشیبی علاقے زیر آب آنے کا خدشہ ہے۔
اس کے علاوہ خیبر پختونخوا میں 29 تا 31 اگست کے دوران شدید بارشوں کا امکان جبکہ مالاکنڈ و ہزارہ ڈویژن ، آزاد کشمیر اور گلگت بلتستان میں لینڈ سلائیڈنگ اور گلیشیائی جھیلوں کے پھٹنے کا خدشہ ظاہر کیا گیا ہے۔
محکمہ موسمیات کے مطابق کراچی، ٹھٹھہ، سجاول، بدین، تھرپارکر بارشوں سے سیلاب جبکہ بلوچستان میں لینڈ سلائیڈنگ ہو سکتی ہے۔
دیکھیں: وزیرِ اعظم شہباز شریف کا سیلابی علاقوں کا دورہ، اہم ہدایات جاری کر دیں