فرانس کا عائشہ رضا فاروق کے لیے اعلیٰ ترین قومی اعزاز ‘نیشنل آرڈر آف میرٹ’ کا اعلان

فرانس کی حکومت نے پاکستان میں بچوں کے حقوق کے تحفظ اور پولیو کے خاتمے کے لیے گراں قدر خدمات انجام دینے پر محترمہ عائشہ رضا فاروق کو اپنے قومی اعزاز “نیشنل آرڈر آف میرٹ” سے نوازا ہے۔ عائشہ رضا فاروق اس وقت نیشنل کمیشن برائے حقوقِ اطفال کی چیئرپرسن اور انسدادِ پولیو مہم کی قومی رابطہ کار کے طور پر فرائض انجام دے رہی ہیں۔

فرانسیسی حکومت کی جانب سے یہ اعلیٰ ترین اعزاز ان کی انسانی حقوق، بالخصوص بچوں کے حقوق کے فروغ کے لیے غیر متزلزل وابستگی اور انتھک جدوجہد کے اعتراف میں دیا گیا ہے۔ عائشہ رضا فاروق نے تعلیم اور صحت کے شعبوں میں بچوں کی فلاح و بہبود کے لیے کلیدی کردار ادا کیا ہے، جس کی بدولت پاکستان میں پولیو کے خاتمے کی مہم کو عالمی سطح پر پذیرائی حاصل ہوئی۔

علاوہ ازیں انہوں نے انسانی حقوق سے متعلق مشترکہ ترجیحات پر پاکستان اور فرانس کے مابین باہمی تعاون کو مستحکم کرنے میں بھی مسلسل اور موثر کردار ادا کیا ہے۔ اس اعزاز کی تفویض دونوں ممالک کے درمیان سماجی و انسانی ہمدردی کے شعبوں میں بڑھتے ہوئے اشتراکِ عمل کی عکاسی کرتی ہے۔

دیکھیے: چیف جسٹس یحییٰ آفریدی کا میڈیکل بورڈ تشکیل دینے کا حکم