نیویارک: امریکی سپر ماڈل جیجی حدید نے جیفری ایپسٹین سے متعلق سامنے آنے والی دستاویزات میں اپنا نام آنے پر وضاحت دیتے ہوئے کہا ہے کہ ان کا اس معاملے سے کوئی تعلق نہیں اور انہوں نے ایپسٹین سے کبھی ملاقات تک نہیں کی۔
رپورٹس کے مطابق امریکی محکمہ انصاف کی 2015 کی ایک ای میل میں جیفری ایپسٹین اور ایک نامعلوم شخص کے درمیان گفتگو کے دوران جیجی حدید اور ان کی بہن بیلا حدید کا ذکر سامنے آیا، جس کے بعد سوشل میڈیا پر قیاس آرائیوں کا سلسلہ شروع ہو گیا۔
جیجی حدید نے سوشل میڈیا پر ردعمل دیتے ہوئے ایپسٹین کو “انتہائی گھٹیا انسان” قرار دیا اور کہا کہ یہ افسوسناک ہے کہ ایک ایسا شخص، جس سے ان کی کبھی ملاقات بھی نہیں ہوئی، ان کا نام استعمال کر رہا ہے۔
انہوں نے واضح کیا کہ اس وقت ان کی عمر تقریباً 20 سے 21 سال تھی اور ان کا ایپسٹین کے ساتھ کسی بھی قسم کا کوئی تعلق نہیں تھا۔
جیجی حدید کا کہنا تھا کہ وہ اس معاملے میں اصل متاثرین کی توجہ ہٹانا نہیں چاہتیں، تاہم اپنے بارے میں پھیلنے والی غلط فہمی کو دور کرنا ضروری سمجھتی ہیں۔
دستاویزات کے مطابق ای میل میں ایک شخص نے حدید بہنوں کی کامیابی پر سوال اٹھایا تھا، جس پر ایپسٹین نے مبہم جواب دیا، جس کے بعد یہ معاملہ زیر بحث آ گیا۔
واضح رہے کہ جیفری ایپسٹین کو 2019 میں جنسی اسمگلنگ کے سنگین الزامات میں گرفتار کیا گیا تھا اور بعد میں وہ جیل میں مردہ حالت میں پائے گئے تھے، جس کے بعد سے یہ کیس عالمی سطح پر توجہ کا مرکز بنا ہوا ہے۔
دیکھئیے:حکومت، معیشت اور کرکٹ سے کوئی امید نہیں، فضیلہ قاضی نے بنیادی سہولیات کی کمی پر سوال اٹھا دیا