تہران: ایران کے سرکاری میڈیا نے دعویٰ کیا ہے کہ متحدہ عرب امارات ایران کے خلاف جاری جنگ میں شامل ہو گیا ہے، تاہم اس دعوے کی آزاد ذرائع سے تصدیق نہیں ہو سکی۔
ایرانی نشریاتی ادارے آئی آر آئی بی کے مطابق ایکس پر جاری بیان میں کہا گیا ہے کہ انہیں ایسی دستاویزات حاصل ہوئی ہیں جو یو اے ای کی مبینہ شمولیت کو ظاہر کرتی ہیں۔
رپورٹ میں دعویٰ کیا گیا کہ یکم اپریل کو چینی ساختہ ونگ لونگ-2 ڈرون کی تباہی، جو صرف سعودی عرب اور متحدہ عرب امارات کے پاس موجود ہے، اور 22 مارچ کو ایرانی جزیرہ جاسک کے قریب اماراتی میراج 2000 طیارے کی پرواز اس بات کے شواہد ہیں۔
ایرانی میڈیا کے مطابق یہ دونوں واقعات ایران کے خلاف جاری کارروائیوں میں یو اے ای کے کردار کی نشاندہی کرتے ہیں، تاہم ان دعوؤں کی کسی آزاد یا بین الاقوامی ذریعے سے تصدیق سامنے نہیں آئی۔
دوسری جانب متحدہ عرب امارات کی جانب سے ان الزامات پر تاحال کوئی باضابطہ ردعمل جاری نہیں کیا گیا۔
واضح رہے کہ ایران حالیہ کشیدگی کے دوران اسرائیل کے ساتھ ساتھ ان ممالک کو بھی نشانہ بنا رہا ہے جہاں امریکی فوجی اثاثے موجود ہیں، جن میں اردن، عراق اور بعض خلیجی ریاستیں شامل ہیں۔
تجزیہ کاروں کے مطابق خطے میں بڑھتی ہوئی کشیدگی کے دوران اس نوعیت کے دعوے اور جوابی بیانات صورتحال کو مزید پیچیدہ بنا سکتے ہیں، اس لیے تصدیق شدہ معلومات کی اہمیت مزید بڑھ گئی ہے۔
دیکھئیے:خلیجی لبادے میں صیہونی مہرہ: امجد طہٰ کا اصل چہرہ اور نیتن یاہو سے گٹھ جوڑ بے نقاب
