امریکہ، سعودی عرب، قطر، ترکیہ اور یو اے ای سمیت متعدد ممالک کی بلوچستان میں ہونے والی دہشت گردانہ کاروائیوں کی شدید مذمت

گزشتہ روز بلوچستان میں بی ایل اے کی جانب سے کیے گئے دہشت گرد حملوں کی عالمی سطح پر مذمت جاری ہے۔ امریکہ، سعودی عرب، ترکیہ، قطر اور متحدہ عرب امارات سمیت متعدد ممالک نے ان حملوں کی شدید مذمت کرتے ہوئے دہشت گردی کے خلاف جنگ میں پاکستان کے شانہ بشانہ کھڑ رہنے کا اعلان کیا ہے۔

سعودی وزارت خارجہ کا بیان

سعودی عرب کی وزارتِ خارجہ نے پاکستان کے صوبہ بلوچستان کے مختلف علاقوں میں دہشت گردوں کی جانب سے کیے گئے دہشت گرد حملوں کی سخت الفاظ میں مذمت اور شدید مخالفت کا اظہار کیا ہے۔ بیان میں کہا گیا کہ سعودی عرب ہر قسم کی دہشت گردی اور تشدد کو مسترد کرتا ہے اور پاکستان کے ساتھ مکمل یکجہتی کا اعادہ کرتا ہے۔

امریکی ناظم الامور نیٹلی بیکر کا بلوچستان حملوں پر سخت ردعمل

امریکہ کی ناظم الامور نیٹلی بیکر نے 31 جنوری کو بلوچستان میں سکیورٹی اہلکاروں اور شہریوں کے خلاف ہونے والے دہشت گرد حملوں کی سخت مذمت کی ہے، جن کی ذمہ داری کالعدم تنظیم بلوچستان لبریشن آرمی (بی ایل اے) نے قبول کی، جو امریکا کی جانب سے نامزد غیر ملکی دہشت گرد تنظیم ہے۔

انہوں نے کہا کہ امریکہ کی جانب سے دہشت گردی کے متاثرین، ان کے اہلِ خانہ اور تمام متاثرہ افراد سے دلی ہمدردی اور تعزیت کا اظہار کیا جاتا ہے۔ نیٹلی بیکر کے مطابق پاکستانی عوام تشدد اور خوف سے پاک زندگی گزارنے کے حق دار ہیں۔

انہوں نے مزید کہا کہ امریکہ امن و استحکام کو یقینی بنانے کے لیے پاکستان کا ایک مضبوط شراکت دار ہے اور اس مشکل وقت میں پاکستان کے ساتھ مکمل یکجہتی کا اظہار کرتا ہے۔

قطر کی جانب سے بلوچستان میں دہشت گردی کی مذمت

قطر نے بھی پاکستان کے صوبہ بلوچستان میں ہونے والے دہشت گرد حملوں کی شدید مذمت کی ہے۔ قطری وزارتِ خارجہ کے مطابق ایسے پرتشدد اقدامات علاقائی امن و سلامتی کے لیے سنگین خطرہ ہیں۔ قطر نے دہشت گردی کے خلاف پاکستان کی کوششوں کی حمایت کرتے ہوئے متاثرین کے ساتھ ہمدردی کا اظہار کیا ہے۔

متحدہ عرب امارات کا بلوچستان حملوں پر ردعمل

متحدہ عرب امارات کی وزارت خارجہ نے ردعمل دیتے ہوئے کہا کہ بلوچستان میں ہونے والے دہشت گرد حملوں کی سخت مذمت کی ہے۔ اماراتی حکومت نے دہشت گردی کے تمام مظاہر کو مسترد کرتے ہوئے پاکستان کے عوام اور حکومت کے ساتھ مکمل یکجہتی کا اظہار کیا ہے اور متاثرین کے اہلِ خانہ سے تعزیت کی ہے۔

ترکیہ کا ردعمل

ترکیہ کی وزارت خارجہ نے بھی پاکستان پر حملوں کی شدید مذمت کی ہے۔

اپنے بیان میں انہوں نے کہا ہے کہ ترکیہ عوام پاکستان سے ہمدردی کا اظہار کرتا ہے اور دہشت گردی کے خلاف جنگ میں پاکستان کے ساتھ رہے گا۔

دیکھیے: آپریشن ہیروف ناکام: پاکستانی فورسز کی فتح اور درپیش چیلنجز